११ जेठ/अर्थ र व्यापार – आगामी आर्थिक वर्ष २०८०/०८१ को बजेट सार्जजनिक हुने दिन नजिकिएसँगै अहिले सरकारलाई नयाँ बजेटको चटारो छ । आगामी नयाँ बजेट सार्वजनिक हुने दिन आउन अब जम्मा पाँच दिन मात्र बँकी छ ।
आगामी सोमबार सार्वजनिक हुने नयाँ बजेटमा जुटेका अर्थमन्त्री डा.प्रकाशशरण महतले आगामी आर्थिक वर्ष २०८०÷०८१ को बजेटमार्फत लिइने कर तथा राजस्वको दर यहि १३ जेठ शनिबार नै तोक्ने भएका छन् ।
आगामी शनिबार अर्थमन्त्री महतले करका दरहरुका सम्बन्धमा निर्णय गर्ने अर्थमन्त्रालय स्रोतले जनाएको छ । हरेक वर्ष १५ जेठमा नयाँ बजेट ल्याउनैपर्ने संवैधानिक प्रावधान छ । सामान्यतया, बजेट सार्वजनिक हुने दिनको अघिल्लो राती मात्रै करका दरहरुलाई अन्तिम रुप दिने गरिन्छ ।
यसपाली भने अर्थमन्त्री महतले दुईदिन अघि १३ जेठ मै करका दरहरुबारे अन्तिम निर्णय गर्ने बताएका छन । करका दर हेरफेरका सम्बन्धमा अर्थ मन्त्रालयको राजस्व व्यवस्थापन महाशाखाले भन्सार विभाग र आन्तरिक राजस्व विभागमार्फत सुझाव लिएर सोही अनुसार तयारी गरिरहेको छ ।

राजस्व व्यवस्थापन महाशाखाले करका दरहरुका विषयमा आफ्नो तर्फबाट सक्नुपर्ने काम शुक्रबार सकेर अन्तिम निर्णयका लागि बजेट महाशाखा हुँदै अर्थमन्त्री समक्ष पुर्याउनेछ ।
त्यसपछि शनिबार अर्थ मन्त्रीले करका दरका विषयमा निर्णय गर्नेछन् । मन्त्रालयको टिमले भ्याट छुटको सूची हटाउने, विलासी कर लगाउने, अन्तःशुल्क परिमार्जन गर्ने लगायतका विषय सहितको प्रतिवेदन तयार तयार पारिसकेको छ । प्रतिवेदनमा अर्थमन्त्री महतले ‘फाइनल लुक’ गरेर करका दरबारे निर्णय लिनेछन् ।
१३ जेठ मा करका दरहरु तोकेर राखिएपछि १४ जेठमा सरकार पक्षका दलहरुबीच बजेटबारे अन्तिम ‘ब्रिफिङ’ चल्ने बताइएको छ । सोही दिन योजना आयोग र मन्त्रिपरिषदमा पनि अर्थमन्त्री महतले बजेटबारे ब्रिफिङ गर्नेछन् ।
अर्थ मन्त्रालयले बनाएको बजेट कार्यतालिका अनुसार १३ जेठमा बजेट वक्तव्य, आर्थिक र विनियोजन विधेयकलाई अन्तिम रूप दिने उल्लेख थियो । सोही अनुसार १३ जेठमा बजेटले अन्तिम रुप ग्रहण गर्नेछ ।