११ बैशाख/अर्थ र व्यापार – निजी क्षेत्रमा अख्तियार ल्याइए लगानी निरुत्साहित हुने भन्दै अतालिएका उद्योग वाणिज्य महासंघको प्रतिनिधिमण्डल अहिले विभिन्न राजनीतिक दलका शीर्ष नेताहरुको घरदैलोमा पुग्न थालेका छन । महासंघको अध्यक्ष चन्द्रप्रसाद ढकालको नेतृत्वमा सहभागी व्यवसायीको प्रतिनिधीले सोमबार नेपाली कांग्रेसका सभापति शेरबहादुर देउवा र नेकपा एमालेका अध्यक्ष केपीशर्मा ओलीसँग छुट्टाछुट्टै भेटवार्ता गरेका छन ।
भेटवार्ताका क्रममा दुवै नेताले निजी क्षेत्रलाई अख्तियारको दायरामा ल्याइए लगानी निरुत्साहित हुन सक्ने भएकाले आफूहरु यस विषयमा गम्भीर रहेको बताएका छन् ।
राष्ट्रियसभाबाट प्रतिनिधिसभामा आएको अख्तियार दुरुपयोग अनुसन्धान आयोग सम्बन्धी संशोधन विधेयकमा निजी क्षेत्रलाई समेत समेट्ने व्यवस्था भएकोले अहिले सो व्यवस्था हटाउन महासंघका अध्यक्ष चन्द्रप्रसाद ढकालले दुवै दलका शीर्ष नेतासमक्ष यस्तो व्यवस्था हटाउन आग्रह गरेका थिए ।
उनले अर्थतन्त्रमा ८० प्रतिशत भन्दा बढी लगानी र रोजगारी दिइरहेको निजी क्षेत्र उक्त व्यवस्था पारित भएमा हतोत्साही हुने र लगानीको वातावरण विग्रिनेतर्फ नेताहरुको ध्यानाकर्षण गराए ।
दुवै भेटमा बैंकिङ प्रणालीमा करिब दुई खर्ब रुपैयाँ तरलता उपलब्ध हुँदाहुँदै पनि कर्जा प्रवाह नभइरहेको अवस्था भएकाले ब्याजदर कम गर्न तत्काल नीतिगत उपाय अवलम्बन गर्नुेपर्नेतर्फ अध्यक्ष ढकालले ध्यानाकर्षण गराए ।
पूर्व प्रधानमन्त्री समेत रहेका शेरबहादुर देउवाले आफ्नो पार्टी उदारवादी अर्थतन्त्रमा विश्वास गर्ने हुँदा निजी क्षेत्रका समस्या सम्बोधन गर्न प्रयास गर्ने बताए ।
यसैगरि, पूर्व प्रधानमन्त्री ओलीले निजी क्षेत्रका समस्या सम्बोधन गरी निर्वाध काम गर्ने वातावरण बनाउन आफू र आफ्नो पार्टी सधै तत्पर रहेको बताए । वित्तीय क्षेत्रका समस्या समाधान गरी कर्जा प्रवाह बढाउनुपर्ने पक्षमा आफू रहेको उनले बताए ।