५ बैशाख/अर्थ र व्यापार – नेपाल उद्योग वाणिज्य महासंघको कोषाध्यक्षमा निरक केसी निर्वाचित भएका छन् । सोमबार महासंघमा भएको निर्वाचनमा केसीले ३८ मत प्राप्त गर्दै विजयी हासिल गरेका हुन् । उनको प्रतिस्पर्धी प्रवलजंग पाण्डेले २९ मत प्राप्त गरेका थिए । यसबाहेक एउटा मत बदर भएको थियो । कोषाध्यक्षमा निर्वाचित केसीलाई अध्यक्ष चन्द्रप्रसाद ढकालको समर्थन रहेको थियो ।

पाण्डेलाई बरिष्ठ उपाध्यक्ष अन्जनकुमार श्रेष्ठको समर्थन रहेको थियो । नवनिर्वाचित महासंघको नयाँ नेतृत्वमा सहभागी कार्यकारीणी समितिले कोषाध्यक्ष छनोट गर्ने प्रावधान छ । सोही प्रावधान अनुसार सोमबार कोषाध्यक्षका लागि सुरुमा ४ जनाले उम्मेद्वारी दिने घोषणा गरे पनि अन्तिममा केसी र पाण्डेको मात्र उम्मेदवारी परेको थियो ।

यसअघि आइतबार नेपाल उद्योग वाणिज्य महासंघका नवनिर्वाचित अध्यक्ष चन्द्रप्रसाद ढकालले पदभार ग्रहण गरेका थिए । ढकालले आइतबार काठमाडौको टेकुस्थित महासंघको कार्यालयमा पदभार ग्रहण गरेका हुन्।
महासंघको विधानअनुसार बरिष्ठ उपाध्यक्ष ढकाल आगामी तिनवर्षे कार्यकालका लागि स्वतः अध्यक्ष भएका हुन् । पदभार ग्रहण गर्दै ढकालले आफू सानो व्यवसाय सुरु गरी यहाँसम्म आएको भन्दै अब अध्यक्षका रुपमा साना व्यवसायीहरुको हितमा काम गर्ने प्रतिबद्धता व्यक्त गरेका थिए । यसले नै महासंघ साना ठूला सवैको साझा संस्था भएको प्रमाणित गरेको उनको भनाई थियो ।

महासंघको गत २८ र २९ चैतमा सम्पन्न भएको ५७ औँ वार्षिक साधारण सभामा भएको निर्वाचनबाट बरिष्ठ उपाध्यक्षमा अञ्जनकुमार श्रेष्ठ निर्वाचित भएका थिए । यसैगरि, जिल्लानगर उपाध्यक्षमा सुरकृष्ण बैद्य निर्वाचित भएका थिए भने एसोसिएट उपाध्यक्षमा ज्योत्सना श्रेष्ठ सुब्बा र वस्तुगत उपाध्यक्षमा हेमराज ढकाल निर्वाचित भएका थिए ।
सो चुनावबाट एकजना बरिष्ठ उपाध्यक्ष सहित ६४ जना निर्वाचित महासंघका पदाधिकारी तथा कार्यकारिणी सदस्यहरुले आइतबार आफ्नो पदबहाली गरेका थिए । निर्वाचनबाट निर्वाचित पदाधिकारी र सदस्यलाई अध्यक्ष ढकालले शपथ खुवाएका थिए ।

महासंघको विधानअनुसार यसअघिका वरिष्ठ उपाध्यक्ष स्वतः अध्यक्ष हुने व्यवस्था अनुरूप महासंघको नेतृत्व लिएका ढकालले भने गत शुक्रबार नै शपथ खाइसकेका थिए ।
पदबहाली गरेपछि महासंघ सचिवालयका कर्मचारीहरुलाई ढकालले संवोधन गरेका थिए । आफ्नो पदबहालीकै क्रममा ढकालले महासंघ सचिवालयमा मेलमिलाप केन्द्र सञ्चालन गर्ने सम्बन्धी पहिलो निर्णयमा हस्ताक्षर गरेका थिए ।

आइतबार अध्यक्ष ढकाल महासंघ सचिवालयमा पुग्दा महासंघ सचिवालय प्रमुख एवं महानिर्देशक गोकर्णराज अवस्थीको नेतृत्वमा कर्मचारीहरुले खादा र माला लगाएर स्वागत गरेका थिए । सोही कार्यक्रममा भर्खर सम्पन्न महासंघको मुख्य निर्वाचन अधिकृत लीलामणी पौडेलले निर्वाचित पदाधिकारी एवं कार्यकारिणी समिति सदस्यहरुलाई प्रमाणपत्र वितरण सहित बधाई दिएका थिए । त्यसपछि अध्यक्ष ढकालले नवनिर्वाचित बरिष्ठ उपाध्यक्ष, उपाध्यक्षहरु, कार्यकारिणी समिति सदस्यहरुलाई सपथग्रहण गराएका थिए ।