२९ चैत/अर्थ र व्यापार – निजी क्षेत्रको संघिय प्रतिनिधीमुलक छाता संस्था नेपाल उद्योग वाणिज्य महासंघको बुधबार बिहान १० बजेबाट सुरु भएको निर्वाचनमा अहिलेसम्म दुई वटा संघतर्फको मतदान सकिएको छ ।
महासंघको वस्तुगत तर्फ र जिल्ला नगर तर्फ तोकिएको समय दिउँसो ५ बज्नुभन्दा अगावै मतदान सम्पन्न भएको महासंघ निर्वाचन मुख्य निर्वाचन अधिकृत लिलामणी पौडेलले जानकारी दिए ।
निर्वाचन समितिको पछिल्लो विवरण अनुसार अहिलेसम्म दुवै संघमा शत प्रतिशत मत खसेको छ । निर्वाचन समितिका अनुसार महासंघको वस्तुगत तर्फको १२३ वटा मत रहेकोमा शतप्रतिशत पुरै मत खसेको हो । यसैगरि, जिल्ला÷नगरतर्फ पनि शतप्रतिशत मत खसेको छ । जसमा ११७ मतदाता रहेकोमा सम्पूर्ण मत खसेको निर्वाचन समितिले जानकारी दिएको छ ।

एकजना बरिष्ठ उपाध्यक्ष सहित कुल ६४ पदकालागि भएको सो निर्वाचनमा देसभरका व्यवसायी सहभागी भएका छन । महासंघ निर्वाचन समितिका अनुसार एशोसिएट तर्फको मतदान प्रक्रिया भने जारी रहेको छ । बिहान ८ बजेबाट थालिने भनिएको मतदान शुरु गर्न नै ढिला भएका कारण अहिले साँझ ५ बजेसम्मको समय पुनः २ घण्टा थप गरिएको निर्वाचन समितिले जनाएको छ ।
निर्वाचन समितिका अनुसार १ हजार ७४८ मतदाता रहेकोमा हालसम्म ८७६ मत मात्रै खसेको छ । मंगलबार सुरु भएको महासंघको ५७ औँ वार्षिक साधारणसभामा नेतृत्व चयनका लागि बुधबार ढिलागरी मतदान शुरु भएको थियो ।
महासंघको वरिष्ठ उपाध्यक्षका लागि उमेशलाल श्रेष्ठ, अन्जन श्रेष्ठ र रामचन्द्र संघईको समुह चुनावी मैदानमा छन् । कूल ६४ पदका लागि ११६ जनाले उम्मेदवारी दिएका थिए । जसमा जिल्ला नगरतर्फ १८ सदस्यका लागि ३२, वस्तुगततर्फ १४ सदस्यका लागि २८ र एसोसिएटतर्फ १९ सदस्यका लागि २९ जनाको उम्मेदवारी दिएका हुन् ।
महासंघको जिल्ला नगरको उपाध्यक्षमा तीन जना, वस्तुगत उपाध्यक्षमा तीन जना र एशोसिएट उपाध्यक्षमा दुई जनाको उम्मेदवारी परेको थियो । जिल्ला नगर उपाध्यक्षका लागि सुरकृष्ण उपाध्याय, अरुणराज सुमार्गी र दिनेश श्रेष्ठ, वस्तुगत उपाध्यक्षमा सुकुन्तलाल हिराचन, मनिषलाल प्रधान र हेमराज ढकाल र एशोसिएट उपाध्यक्षका लागि जोत्यसना श्रेष्ठ र भरत राज आचार्यले उम्मेदवारी दिएका थिए ।
यसैगरि, महासंघको जिल्ला नगर संघको १८ सदस्यका लागि ३२ जना, वस्तुगत संघको १४ सदस्यका लागि २८ जना र एशोसिएटतर्फ १९ सदस्यका लागि ३० जना गरी कूल ९० जनाको उम्मेदवारी परेको छ ।
महासंघको विधान अनुसार प्रत्येक प्रदेशबाट एक÷एक जना सदस्य हुन पाउने व्यवस्था छ । जसमा लुम्बिनी प्रदेशबाट निर्विरोध निर्वाचित भइसकेका छन् भने अन्य प्रदेशमा निर्वाचन हुने भएको छ । सुदूरपश्चिम प्रदेशबाट २ जना, कर्णाली प्रदेशबाट ३ जना, गण्डकी प्रदेशबाट २ जना, बाग्मती प्रेदशबाट २ जना, कोशी प्रदेशबाट ३ जना र मधेश प्रदेशबाट २ जनाले उम्मेदवारी दिएको पौडेलले बताए ।