१६ चैत/अर्थ र व्यापार – अझै मुलुकमा कायमै रहेको बैंकिङ तरलताको समस्या समाधान गर्नकालागि नेपाल राष्ट्र बैंकले नयाँ प्रयास गरेको छ । जसकालागि राष्ट्र बैंकले बैंकिङ प्रणालीमा तरलता पठाउन ट्रेजरी बिल सोझै खरिद बोलकबोल (आउटराइट पर्चेज) गरि २५ अर्ब रुपैयाँ बैंकिङ प्रणालीमा पठाउने भएको छ ।
राष्ट्र बैंकले आगामी असार मसान्तसम्म भुक्तानी अवधि भएका २५ अर्ब रुपैयाँ बराबरको ट्रेजरी बिल आउटराइट पर्चेजका लागि बोलकबोल आह्वान गरेको छ ।

आज बिहीबार ३ बजेसम्म आवेदन दिन सकिने सो आउटराइट पर्चेजको भोली शुक्रबार खरिद हुने राष्ट्र बैंकले जनाएको छ ।
बैंक तथा वित्तीय संस्थाले बिक्री गर्न चाहेको ट्रेजरी बिल ५ करोड वा ५ करोडले भाग लाग्ने खरिद गर्न चाहेको रकमसम्म बोलकबोल पेश गर्न सक्ने राष्ट्र बैंकले जनाएको छ ।
चालु आर्थिक वर्षमा यसअघि पनि राष्ट्र बैंकले आउटराइट पर्चेज मार्फत ८३ अर्ब ८५ करोड रुपैयाँ तरलता बैंकिङ प्रणालीमा पठाइसकेको छ । यसअघि गत ९ भदौमा २५ अर्ब, ६ असोजमा ४० अर्ब, २४ कात्तिकमा ३० अर्ब र ८ मंसिरमा २० अर्ब रुपैयाँ बराबरबको ट्रेजरी बिल आउटराइट पर्चेज मार्फत खरिद गर्न प्रस्ताव आह्वान गरेको भएपनि सो ८३ अर्ब ८५ करोड रुपैयाँ मात्रको खरिद गरेको थियो।
राष्ट्र बैंकले जानकारी गराए अनुसार ट्रेजरी बिल एक वर्षवा एकवर्षन्दा कम अवधिको आन्तरिक ऋण उठाउन प्रयोग गरिने अल्पकालीन सरकारी ऋणपत्र हो । ट्रेजरी बिलहरू अवधिको आधारमा २८ दिने, ९१ दिने, १८२ दिने र ३६४ दिने गरी ४ किसिमका हुन्छन् ।
अहिले राष्ट्र बैंकले गरेको यस्तो नयाँ प्रयासले बैंकिङ तरलताको समस्या समाधानकालागि निकै सहयोग हुने अपेक्षा गरिएको छ ।