४ फागुन/अर्थ र व्यापार – पछिल्लो समय जीवन बीमा कम्पनीहरुको बीमालेख धितो राखेर कर्जा लिनेहरुको संख्या ह्वात्तै बढेको छ । संचालनमा रहेका १८ वटा जीवन बीमा कम्पनीहरुले चालु आर्थिक वर्षको वितेका ६ महिना गत पुस मसान्तसम्मको अवधीमा ७८ अर्ब रुपैयाँ भन्दा बढी बीमालेख धितो कर्जा प्रवाह गरेका छन् ।
पछिल्लो समय बीमालेख धितो राखी कर्जा लिनेको संख्यामा यसरी बढोत्तरी देखिएको पाईएको हो । बीमा कम्पनीहरुले सार्वजनिक गरेको चालु आर्थिक वर्ष २०७८÷७९ को दोस्रो त्रैमासिक वित्तीय प्रतिवेदनले यस्तो अवस्था देखाएको हो ।
चालु आवको पुस मसान्तसम्ममा कम्पनीहरुले बीमालेख धितो कर्जा ३६.९० प्रतिशतले वृद्धि भई ७८ अर्ब २१ करोड ९ लाख २२ हजार रुपैयाँ पुगेको छ । गत आर्थिक वर्षको पुस मसान्तसम्ममा भने विभिन्न विमा कम्पनीहरुले कुल ५७ अर्ब १२ करोड ६७ लख ७४ हजार रुपैयाँ बीमालेख धितो कर्जा प्रवाह गरेका थिए ।
जीवन बीमा कम्पनीहरुबाट बीमितले बीमालेख धितो राखी सम्वन्धित कम्पनीबाट कर्जा लिनपाइने व्यवस्था रहेको छ । बीमालेख बाहेक अन्यकुनै पनि प्रकारको चल, अचल सम्पत्ति धितो नराखीकनै ऋण प्राप्त गर्न सक्ने पनि व्यवस्था रहेको छ ।
जीवन बीमा लेख सम्बन्धी निर्देशिका, २०७८ बमोजिम बीमा सुरु भएको तीनवर्ष पूरा पुगेपछि बीमालेख धितो राखीकर्जा लिन पाउने व्यवस्था छ ।
चालु आवको पुस मसान्तसम्ममा सबैभन्दा धेरै बीमालेख धितो कर्जा नेपाल लाइफ इन्स्योरेन्स कम्पनीका बीमितले लिएका छन् ।
सो अवधिमा कम्पनीका बीमितले आफ्नो बीमालेख धितो राखी २७ अर्ब ८९ करोड ८५ लाख ९७ हजार रुपैयाँ कर्जा लिएका छन् । गत वर्षको पुस मसान्तसम्मको तुलनामा कम्पनीको यस्तो कर्जा प्रवाह २८.६९ प्रतिशतले बढेको हो ।
गत वर्षको सोही अवधिमा कम्पनीले बीमितले आफ्नो बीमालेख धितो राखी २१ अर्ब ६७ करोड ८४ लाख १० हजार रुपैयाँ ऋण लिएका थिए ।
चालु आवको ६ महिनामा लाइफ इन्स्योरेन्स कर्पोरेशन (नेपाल) ले बीमालेख धितो मार्फत बीमितलाई २० अर्ब ८० करोड ८५ लाख ९७ हजार रुपैयाँ कर्जा दिएको छ । यो गत वर्षको पुस मसान्तसम्मको तुलनामा भने ३३.०३ प्रतिशतले बढी हो । कम्पनीका बीमितले गत वर्षको सोही अवधिमा आफ्नो बीमालेख धितो राखी १५ अर्ब ६४ करोड १६ लाख रुपैयाँ ऋण लिएका थिए ।
चालु आवको दोस्रो त्रैमासमा नेशन लाइफसहित आठ वटा कम्पनीका बीमितले आफ्नो बीमालेख धितो राखी १ अर्बभन्दा बढी ऋण लिएका छन् । सो अविधमा नेशनल लाइफका बीमितले ९ अर्ब ४८ करोड ३२ लाख रुपैयाँ बीमालेख धितो राखी कर्जा लिएको देखिएको छ । जुन गत वर्षको पुस मसान्तसम्मका तुलनामा भने ३६.२६ प्रतिशतले बढी हो । सो अवधिमा एशिन लाइफका बीमितले आफ्नो बीमालेख धितो राखी ४ अर्ब ५२ करोड १६ लाख रुपैयाँ, सूर्यज्योतिका बीमितले ३ अर्ब २९ करोड ८९ लाख रुपैयाँ ऋण लिएका छन् ।
यस्तै, चालु आवको ६ महिनामा राष्ट्रिय बीमा संस्थानले बीमालेख धितो मार्फत आफ्ना बीमितलाई २ अर्ब ५३ करोड ५ लाख, प्राइमले २ अर्ब ४८ करोड २४ लाख, मेट लाइफले १ अर्ब ४२ करोड १३ लाख, गुराँस लाइफले १ अर्ब ३२ करोड र युनियन लाइफले १ अर्ब २४ करोड १० लाख रुपैयाँ कर्जा दिएका छन् ।
चालु आवको ६ महिनामा रिलायवल लाइफले बीमालेख मार्फत सबैभन्दा कम कर्जा प्रवाह गरेको छ । कम्पनीले सो अवधिमा बीमालेख धितो राखेर बीमितलाई २१ करोड ५० लाख रुपैयाँ ऋण दिएको छ । तर, गत वर्षको पुस मसान्तसम्मको तुलनामा भने यस्तो कर्जा प्रवाह १२१.२४ प्रतिशतले बढी हो ।
सो अवधिमा रिलायन्स लाइफले बीमालेख मार्फत आफ्ना बीमितलाई ६२ करोड ८७ लाख, प्रभुले ५१ करोड ६० लाख, सन नेपालले ४२ करोड ४५ लाख र सिटिजन लाइफले ४२ करोड ७ लाख रुपैयाँ कर्जा दिएको छ ।
यसैगरि, सो अवधिमा महालक्ष्मी लाइफले २६ करोड ३० लाख रुपैयाँ र सानिमा लाइफले २३ करोड ९१ लाख रुपैयाँ बीमालेख धितो मार्फत आफ्ना बीमितलाई कर्जा दिएको छ ।