१९ पुस/अर्थ र व्यापार – नेपाल निर्माण व्यवसायी महासंघको एक प्रतिनिधिमण्डलले सोमबार उप्रधानमन्त्री तथा अर्थमन्त्री विष्णु पौडेल र उप्रधानमन्त्री तथा गृहमन्त्री रवि लामिछानलेसँग अलग अलग भेटी समग्र निर्माण उद्योगका समसामयीक समस्याहरूबारे जानकारी गराएको छ ।
महासंघका अध्यक्ष रवि सिंह नेतृत्वको प्रतिनिधिमण्डलसँग भएको भेटमा उपप्रधानमन्त्रीद्धय पौडेल र लामिछानेले आवश्यक अध्ययन गरी निर्माण उद्योगको समस्या समाधानका लागि आफुहरुले सक्दो पहल गर्ने प्रतिवद्धता जनाएका छन ।
महासंघ प्रतिनिधिमण्डलसँगको छलफलमा उप्रधानमन्त्री तथा अर्थमन्त्री विष्णु पौडेलले पूर्वाधार निर्माण नै समृद्ध मुलुकको आधार भएकाले सरकारले यस क्षेत्रलाई विशेष प्राथमिक्तामा राखेर अघि बढ्ने बताए ।
निर्माण उद्योग सक्षम तथा सबल हुनुपर्ने भन्दै उपप्रधानमन्त्री तथा अर्थमन्त्री पौडेलले निर्माण व्यवसायीसँग यस उद्योगमा देखिएका समस्याबारे छलफल गर्न सरकार तयार रहेको बताए ।
तोकिएको लागत तथा समयमा नै गुणस्तरीय कार्य पूरा गर्न उनले निर्माण व्यवसायीलाई सुझाव दिए । यसैगरि, उप्रधानमन्त्री तथा गृहमन्त्री रवि लामिछानेले निर्माण उद्योगको समस्याबारे आफु जानकार रहेको बताउँदै निर्माण व्यवसायीका समस्याबारे अध्ययन गरी समाधान खोजिने जानकारी दिए ।
उप्रधानमन्त्री तथा गृहमन्त्री लामिछानेले निर्माण व्यसायीलाई कसेर होइन उनीहरूसँग आपसी सहकार्य गरी अघि बढ्ने सोचमा सरकार रहेको प्रष्ट पारे । उनले जनचाहना अनुसार गुणस्तरीय निर्माण कार्यलाई प्राथमिकता दिन व्यवसायीलाई सुझाव दिए । उपप्रधानमन्त्रीद्धय समक्ष महासंघका अध्यक्ष रवि सिंहले हाल आर्थिक अभावका कारण निर्माण उद्योगले चरम संकट झेलिरहेको बताए ।
सार्वजनिक खरिदका कानुन अनुसार निर्माण व्यवसायीले पाउनुपर्ने २० प्रतिशत मोबिलाइजेशन रकम उपलब्ध गराउन पनि अध्यक्ष सिंहले आग्रह गरे । यसैगरि, उनले निर्माण सम्पन्न भएका परियोजनाहरूको समेत भुक्तानी नपाउँदा निर्माण व्यवसायी चर्को आर्थिक मारमा परेको जानकारि गराए । महासंघ अध्यक्ष सिंहले निर्माण आयोजनाको काम सम्पन्न गरिसक्दापनि धेरै व्यवसायीले समयमा भुक्तानी नपाएर व्यवसायी थप मारमा परेको गुनासो गरेका थिए ।
उपप्रधानमन्त्रीद्धयको सफल कार्यकालका लागि शुभकामना व्यक्त गर्दै महासंघ प्रतिनिधिमण्डलले धरौटी रकम फिर्ता, पाँच प्याकेजको कार्यान्वयन, शान्ति सुरक्षा लगायतका विषयमा पनि ध्यानाकर्षण गराएको छ ।
सो भेटवार्तामा महासंघका सल्लाहकारहरू यक्षध्वज कार्की, टेकबहादुर सेठी, बरिष्ठ उपाध्यक्ष आङदोर्जी लामा (एडी), उपाध्यक्ष टोपबहादुर रायमाझी, महासचिव रोशन दाहाल, उपमहासचिव (नीतिगत) शिवहरि घिमिरे,सहकोषाध्यक्ष सन्तोष शाह, कार्य समिति सदस्यहरू अशोककुमार केसी, दानबहादुर खड्का उज्वल गौतम, बालाजु श्रेष्ठ, कार्यालय प्रमुख प्रेम सिंह ऐर लगायतको सहभागिता रहेको थियो ।