२३ कात्तिक/अर्थ र व्यापार– सरकारले आर्थिक वर्ष २०७९/८० को लागि धानको समर्थन मूल्य बढाएर तोकेको छ। कार्तिक १६ गते मन्त्रिपरिषदको बैठकले मोटा र मध्यम धानको न्युनतम समर्थन मूल्य कायम गरेको हो ।
मोटा धान प्रति क्विन्टल २९६७ रुपैयाँ र मध्यम धान प्रति क्विक्नटल ३१२८ रुपैयाँ तोकिएको कृषि तथा पशुपन्छी मन्त्रालयले जनाएको छ ।
सरकारले आर्थिक वर्ष २०७८/७९ मा मोटा धानको मूल्य प्रति क्विन्टल २७५२ रुपैयाँ र मध्यम धान २९०२ रुपैयाँ तोकेको थियो
कृषि तथा पशुपन्छी मन्त्रालयको अनुसार गत वर्षको तुलनामा मोटा धानको मूल्य प्रति क्विटल २१५ रुपैयाँ बढेको छ । यसैगरि, मध्यम धानमा प्रति क्विन्टल २२६ रुपैयाँ बढेको हो । मन्त्रालयले गत साउनमा धानको समर्धन मूल्यको लागि प्रस्ताव गरेको थियो ।
सरकारले तोकेको मूल्यअनुसार खाद्य व्यवस्था तथा व्यापार कम्पनीले विभिन्न जिल्लामा धान खरिद गर्ने गरेको छ भने न्यूनतम समर्थन मूल्यमा कृषि सहकारीमार्फत धान खरदि गर्न ३३ करोड बजेट व्यवस्था रहेको छ ।
प्रधानमन्त्री कृषि आधुनिकीकरण परियोजनामार्फत कृषि सहकारीका लागि तोकिएको न्यूनतम समर्थन मूल्यमा धान खरिदका लागि छुट्टै सूचना जारी गरिने मन्त्रालयले जनाएको छ ।
हाल स्वीकृत कार्यविधि अनुसार तोकिएको मूल्यमा धान खरिद गर्ने कृषि सहकारीहरुलाई ११२ प्रति क्विन्टल व्यवस्थापन खर्च उपलव्ध गराउने व्यवस्था छ ।
गत वर्ष यस कार्यक्रम अनुसार करिव ९ हजार मेट्रिक टन धान खरिद भएको थियो । यस आर्थिक वर्षमा ३ लाख मेट्रिक टन धान खरिदका लागि ३३ करोड रकम विनियोजन गरेको मन्त्रालयले जनाएको छ । विगतका वर्षहरुको भन्दा यसपाली मंसिरे धानको समर्थन मुल्य तोक्न सरकारले ढिलाई गरेको सम्बन्धीत सरोकारवालाहरुले बताएका छन ।
तपाईको प्रतिक्रिया