१९ साउन/अर्थ र व्यापार – पछिल्लो समय लगातार दुईपटकसम्म खरिद मुल्य घटेपनि नेपाल आयल निगमले पेट्रोलियम पदार्थको भाउ घटाएको छैन ।
भारतीय आयल निगमले खरिद मूल्यमा दुई पटकसम्म घटाएर पठाएपनि अझै पुरानो ऋण तिर्नुपर्ने दायित्व बाँकी रहेको भन्दै बढेको बेला हतारमा बढाईहाल्ने र यसरी घटेको बेला नघटाएर उपभोत्तामाथी अन्याय गर्ने निगमले स्वचालित मूल्य समायोजन प्रणाली अनुसार अझै मुल्य नघटाउने बताएको हो ।
निगमले विज्ञप्ति जारी गर्दै हाल पेट्रोल, मट्टितेल र हवाई इन्धनमा खरिद मुल्य केही घटेर आएकाले सामान्य नाफा भए पनि अझै नेपाल सरकारबाट लिएको पुरानो ऋण र इन्डियन आयल कर्पोरेशन (आइओसी)लाई बक्यौता भुक्तानी गर्नुपर्ने पुरानो रकम तिनुपर्ने भएकाले मूल्य समायोजन नहुने जनाएको हो ।
आइओसीबाट अहिले प्राप्त पछिल्लो नयाँ खरिद मूल्य अनुसार पेट्रोलमा प्रतिलिटर १६ रुपैयाँ भाउ घटेको छ । उताबाट ल्याउने क्रममा नै प्रतिलिटर यतिधेरै मुल्य घटेपनि यहाँका उपभोक्तालाई भाउ नघटाएर निगमले गलत काम गरेको आम उपभोक्ता अधिकारकर्मीहरुको भनाई छ ।

लगातार दुईपटकसम्म खरिद मुल्य घटेर आएकाले हाल प्रतिलिटर पेट्रोलमा निगमलाई दुई रुपैयाँ ७८ पैसा नाफा तथा डिजेलमा प्रतिलिटर ९ रुपैयाँ ३७ पैसा र खाना पकाउने एलपी ग्यासमा प्रतिसिलिण्डर चारसय ९९ रुपैयाँ ५७ पैसा घाटा रहेको निगमका सहप्रवक्ता पुस्कर कार्कीले जानकारी दिए । निगमलाई मट्टितेल र हवाई इन्धनमा भने १५ दिनअघि घटेर आएको भाउमा नै नाफा रहेको थियो ।