१० चैत/अर्थ र व्यापार – अर्थमन्त्री जर्नादन शर्माले सार्वजनिक खरिद नियमावलीको एघारौं संशोधनमा रहेका केही प्राविधिक त्रुटिहरू संच्याउने आश्वासन दिएका छन ।  नेपाल निर्माण व्यवसायी महासंघको प्रतिनिधिमण्डलसँगको भेटमा अर्थमन्त्री शर्माले एघारौं संशोधनमा देखिएका प्राविधिक त्रुटिहरू संशोधन गर्ने आश्वासन दिएका हुन ।
उनले निर्माण व्यवसायीसँग सहकार्य गरी सरकार भौतिक पूर्वाधार विकास निर्माणको कार्यमा अद्दि बढ्ने बताए । काठमाडौमा सम्पन्न २३ औं साधारण सभा तथा १२ औं अधिवेशनको काठमाडौं घोषणापत्र कार्यान्वयन तथा सार्वजनिक खरिद नियमावलीको एघारौं संशोधनका विषयमा जानकारी गराउन महासंघ अध्यक्ष रवि सिंह नेतृत्वको प्रतिनिधिमण्डलले अर्थमन्त्री शर्मालाई भेटेको थियो ।
मन्त्री शर्माले समयमै काम सकेर पूजिँगत खर्च गर्ने सरकारको लक्ष्यमा सघाउन व्यवसायीलाई आग्रह गरे । महासंघको नवनिर्वाचित कार्यसमितिलाई बधाई दिँदै उनले सफल कार्यकालका लागि शुभकामना व्यक्त गरे ।
महासंघ प्रतिनिधिमण्डलले अत्याधिक मूल्यवृद्धिका कारण निर्माण कार्य अघि बढाउने अवस्था नरहेको भन्दै सार्वजनिक खरिद अनुगमन कार्यालय मार्फत् मुल्य समायोजन मागदर्शन—२ जारी गराउन आवश्यक पहलकदमीका लागि मन्त्री शर्मा समक्ष आग्रह गरेको छ ।
महासंघ प्रतिनिधिमण्डलले बुधबार नै शहरी विकासमन्त्री रामकुमारी झाँक्रीसँग पनि भेट गरेको थियो । मन्त्री झाँक्रीले खरिद नियमावलीको संशोधनबाट मात्रै निर्माण उद्योगको समस्या समाधान नहुने भन्दै खरिद ऐन÷कानुनमै संशोधन आवश्यक भएको धारणा राखिन । गलत नीति नियमका कारण निर्माण व्यवसायीहरूले सास्ती खेप्नु परेको भन्दै मन्त्री झाँक्रीले निर्माण कार्यमा समस्या देखिने बित्तिकै निर्माण व्यवसायीलाई दोष थुपार्ने प्रवृत्ति गलत भएकाले सरकारी तहबाटै योजना छनौटदेखि नै गलत अभ्यास हुने गरेको बताईन ।
स्वदेशमा सञ्चालित ठूल—ठूला परियोजनामा विदेशी व्यवसायी आवश्यक नभएको भन्दै उनले समयमा नै गुणस्तरीय काम सक्ने सर्तमा व्यवसायीलाई अहिले भन्दा बढी मोबिलाइजेशन खर्च दिनुपर्नेमा जोड दिइन् ।
झाँक्रीसँग पनि महासंघ प्रतिनिधिमण्डलले अत्याधिक मूल्यवृद्धिका कारण निर्माण कार्य अघि बढाउने अवस्था नरहेको भन्दै सार्वजनिक खरिद अनुगमन कार्यालय मार्फत् मुल्य समायोजन मागदर्शन—२ जारी गराउन आवश्यक पहलकदमीका लागि मन्त्री झाँक्री समक्ष आग्रह गरेको छ ।
अध्यक्ष सिंहको नेतृत्वमा गएको महासंघको सो प्रतिनिधिमण्डलमा महासंघका महासचिव रोशन दाहाल, उपमहासचिव (नीतिगत) शिवहरि घिमिरे, कोषाध्यक्ष हिरणकुमार श्रेष्ठ, सहकोषाध्यक्ष सन्तोष शाह, कार्य समिति सदस्यहरू अशोक केसी, राजकुमार बस्ताकोटी, कार्यालय प्रमुख प्रेमसिंह ऐर र जनसम्पर्क अधिकृत रामचन्द्र गिरी लगायतको सहभागिता रहेको थियो ।