२५ फागुन/अर्थ र व्यापार – मुलुकभरका निर्माण व्यवसायीहरुको छाता संस्था नेपाल निर्माण व्यवसायी महासंघको २३औँ साधारण सभा तथा १२औँ अधिवेशन आगामी शुक्रबारदेखि काठमाडौको कमलादीस्थित प्रज्ञा प्रतिष्ठानमा हुने भएको छ । आगामी २९ फागुनसम्म सञ्चालन हुने तीनदिने सोही साधारण सभा तथा अधिवेशनबाट महासंघको नयाँ नेतृत्व समेत चयन हुने छ ।
सो निर्वाचनकालागि महासंघको आगामी अध्यक्षमा पाँचजना व्यवसायी आकांक्षी देखिएका छन् । अहिलेसम्म अध्यक्ष पदमा वर्तमान अध्यक्ष रवि सिंह, पूर्वअध्यक्ष एवं सल्लाहकार रमेश शर्मा, वर्तमान बरिष्ठ उपाध्यक्ष निकोलस पाण्डे, पूर्व महासचिव रामशरण देउजा र नेपाल लोकतान्त्रिक निर्माण व्यवसायी महासंघका अध्यक्ष हुमनाथ कोइरालाले उम्मेदवारी दिने तयारी गरेका छन् ।
अहिलेसम्म अध्यक्षमा चुनावी मैदानमा उत्रिने तयारीमा रहेका कुनैपनि आकांक्षीले आफ्नो प्यानल घोषणा गरेका छैनन् । निर्माण व्यवसायी महासंघका सदस्यहरु धेरैजसो नेपाली कांग्रेस निकट रहेकाले अहिलेका आकांक्षी पाँचै जनाले कांग्रेस पार्टीको निर्णय कुरिरहेका छन् । अझै उनीहरु कांग्रेसको शिर्ष नेताहरुको समर्थन लिन दौडधुपमा लागिरहेका छन् । अन्य पदका आकांक्षीहरुले भने अध्यक्षहरुको कुरा मिलेपछि मात्र आफुअनुकुलको नेतृत्वको प्यानलबाट आ आफ्नो उम्मेदवारी घोषणा गर्ने बताईरहेका छन ।
सो निर्वाचनमा महासंघका सातवटै प्रदेश र ७७ वटै जिल्लाबाट आउने प्रतिनिधिले केन्द्रीय नेतृत्व चयनका लागि मतदान गर्नेछन् । त्यसबाहेक ३९ जना एसोसिएट तर्फका प्रतिनिधिले पनि मतदान गर्नेछन् । प्रत्येक प्रदेशबाट १५ जना प्रतिनिधि आउनेछन् । जिल्ला प्रतिनिधिको संख्या भने सम्बन्धित संघको सदस्य संख्यामा निर्भर हुनेछ । यस निर्वाचनमा जिल्ला स्तरबाट आउने साना व्यवसायी नै निर्णायक हुने भएकाले दलहरूको समर्थन पाउने व्यवसायीले मात्रै महासंघमा निर्वाचन जित्ने अवस्था देखिएको महासंघ स्रोतले जनाएको छ ।
पाँचजना अध्यक्ष पदको आकांक्षीहरुमा पूर्वअध्यक्ष शर्मा ‘शर्मा एन्ड कम्पनी’ का सञ्चालक हुन् । कांग्रेस निकट शर्मा ‘निर्माण व्यवसायी संघ’ बाट महासंघमा रुपान्तरण भएपछिको पहिलो अध्यक्ष पनि हुन् । २० वर्षपछि अध्यक्षमा दोहोरिन इच्छा व्यक्त गरिरहेका उनले अब महासंघमा असक्षम नेतृत्व ल्याउने क्रम रोक्नुपर्ने बताएका छन ।
यसैगरि, अर्का अध्यक्षकै आकांक्षी वर्तमान अध्यक्ष सिंह यसअघि नेपाली कांग्रेसकै समर्थनमा महासंघको अध्यक्ष निर्वाचित भएका थिए । कांग्रेसको १४औं महाधिवेशनमा समेत संस्थापनइतरको समुहबाट केन्द्रीय सदस्यमा पराजित भएका सिंहले यसपटक पनि महासंघमा पुनः अध्यक्ष दोहोराउन कांग्रेसबाट समर्थन खोजिरहेका छन् । उनी महादेव खिम्ती निर्माण सेवाका सञ्चालक हुन । त्यसैगरि, अर्का अध्यक्षका आकांक्षी निकोलस पाण्डे कालिका कन्स्ट्रक्सनको सञ्चालक हुन् । राप्रपाका उपाध्यक्ष बिक्रम पाण्डेका छोरा पाण्डेले महासंघमा अघिल्लो कार्यकालमा नै अध्यक्षमा दावी गरेका थिए । तर, वर्तमान अध्यक्ष सिंहले आगामी कार्यकालमा सहयोग गर्ने वचत दिपछि उनी वर्तमान बरिष्ठ उपाध्यक्षमा नै रोकिएका थिए । यसपटक सिंहले दोहोरिन खोजे पनि अब आफुले अध्यक्षमा उम्मेदवारी दिने पाण्डेको भनाई छ । पाण्डेले यो निर्वाचन जित्न ठूला व्यवसायी, नेकपा एमाले र राप्रपाको समर्थन लिन सक्नेछन् । तर, कांग्रेसको समर्थन नपाई चुनाव जित्न कठिन हुने भएकाले अझै उनले विभिन्न नेता मार्फत लबिङ गरिरहेका छन् ।
त्यसैगरि, अर्का आकांक्षी पूर्वमहासचिव देउजा आर कोमल कन्स्ट्रक्सनका सञ्चालक हुन् । कांग्रेस निकट देउजा महासंघका पूर्व अध्यक्ष स्वर्गिय शरद गौचनको नेतृत्वमा महासचिव थिए । त्यसैगरि, अर्का आकांक्षी बिकोइ बिल्डर्सका सञ्चालक तथा कांग्रेस निकट नेपाल लोकतान्त्रिक निर्माण व्यवसायी संघका अध्यक्ष कोइरालाले पनि अहिले आफूलाई आम व्यवसायीको समर्थन खोज्दै काँग्रेस पार्टीको शीर्ष नेताहरुलाई भेटिरहेका छन् ।
सो साधारणसभा तथा अधिवेशनको उद्घाटन प्रधानमन्त्री शेरबहादुर देउवाले गर्ने कार्यक्रम तय भएको महासंघले जनाएको छ । महासंघका वर्तमान अध्यक्ष रवि सिंह, बरिष्ठ उपाध्यक्ष निकोलस पाण्डे र महासचिव रोशन दाहालका अनुसार यस साधारण सभा तथा अधिवेशनमा करिब १२ सय जना व्यवसायी प्रतिनिधि र १२ सय पर्यवेक्षक गरी कुल २ हजार ४ सय जनाको सहभागीता रहने छ ।
सो अधिवेशनकै क्रममा आगामी नयाँ नेतृत्व चयन गर्नकालागि हुने निर्वाचनबाट कुल ५९ सदस्यीय कार्य समिति मध्ये एकजना अध्यक्ष, एकजना बरिष्ठ उपाध्यक्ष, एसोसियटसहित ८ जना उपाध्यक्ष, एकजना महासचिव, २ जना उपमहासचिव, एक÷एकजना कोषाध्यक्ष र सह–कोषाध्यक्ष सहित जम्मा ४६ पदमा नयाँ नेतृत्व निर्वाचित हुनेछ ।
काठमाडौको कमलादीस्थित प्रज्ञा भवनमा सम्पन्न हुने सो अधिवेशनस्थल बाहिर विभिन्न कम्पनीका ३० वटा स्थल रहने छन् । सो स्टलमा सहभागी हुनेहरुकालागि पनि महासंघले निश्चित शुल्क तोकिएको जनाएको छ । ‘कन्ट्रक्सन रिलेटेड’ कम्पनीका स्टलहरु रहने महासंघले जनाएको छ ।
जसकालागि मुख्य प्रायोजक जेसिबी रहेको छ । सो कार्यक्रमकालागि प्रायोजक एवं स्वास्थ्य उप—समिति संयोजक समेत चयन भएका महासंघका बरिष्ठ उपाध्यक्ष निकोलस पाण्डेका अनुसार यस साधारण सभा तथा अधिवेशनको मुख्य प्रायोजक जेसीबी रहेको छ । उनले यो अधिवेशन विगतका वर्षहरुको भन्दा थप व्यवस्थित बनाउने प्रयास भईरहेको समेत जानकारि गराए ।
यसैगरि, महासंका अध्यक्ष सिंहले पनि यो साधारणसभा तथा अधिवेशन यसअघिको भन्दा थप व्यवस्थित हुने दावी गरे । उनले यो साधारणसभा तथा अधिवेशन सम्पन्न गर्न झन्डै दुई करोड रुपैयाँ खर्च हुने अनुमान महसंघले गरेको बताए । उनले अहिलेसम्म १ करोड ९९ लाख रुपैयाँ खर्च हुने अनुमान गरिएकोमा सो कार्यक्रम सम्पन्न हुनेबेलासम्म थप रकम बढ्न सक्ने बताए ।
महाधिवेशनको तयारीका सम्बन्धमा जानकारी दिन आयोजित पत्रकार सम्मेलनमा अध्यक्ष सिंहले मन्त्रिपरिषदले सार्वजनिक खरिद नियमावलीको ११ औँ संशोधन गरेर अहिलेसम्म राजपत्रमा प्रकाशन नगर्नु दुःखद भएको बताए । उनले जतिसक्दो छिटो सरकारले सार्वजनिक खरिद नियमावलीको ११औँ संशोधनलाई कार्यान्वयनमा ल्याउन आग्रह गरे । अहिले मुलुकभरका आम निर्माण व्यवसायी यसैको प्रतिक्षामा रहेको जानकारि गराए ।