१८ पुस/अर्थ र व्यापार – नेपाल चेम्बर अफ कमर्सको ७० औँ वार्षिकोत्सवका अवसरमा हुलाक टिकट प्रकाशित गरिएको छ ।
सञ्चार तथा सूचना प्रविधिमन्त्री ज्ञानेन्द्रबहादुर कार्कीले चेम्बरले प्रकाशन गरेको हुलाक टिकटको प्रथम दिवसीय आवरणको टाँचा लगाएका हुन् । मन्त्री कार्कीले चेम्बर जस्तो निजी क्षेत्रको संस्थबाट हुलाक टिकट प्रकाशित गरिनु राज्यप्रतिको उच्च सम्मान भएको बताए । 
चेम्बरले ५ रुपैयाँदर अंकित मूल्य रहेको १० लाख थान हुलाक टिकट प्रकाशन गरि सार्वजनिक गरेको हो । विभिन्न ६ रंगमा मिश्रित सो हुलाक टिकट इन्डोनेशियामा छापिएको चेम्बरले जनाएको छ । सन् २०२१ मा जारी गरिएको सो हुलाक टिकट शुक्रबारबाट कार्यान्वयनमा ल्याइएको छ । 
सञ्चार तथा सूचना प्रविधि सचिव डा. बैकुण्ठ अर्यालले  देशको आर्थिक विकासका लागि नेपाल चेम्बरले निर्वाह गरेको भूमिकालाई कदर गर्दै हुलाक टिकट प्रकाशन गरिएको बताए । चेम्बर अध्यक्ष राजेन्द्र मल्लले चेम्बरको ७० वर्षको अवधिमा मुलुकको आर्थिक क्षेत्रमा प्रदान गरेको योगदानलाई राज्यले संस्थागत रूपमा कदर गरेकोमा खुसी व्यक्त गर्दै आगामी दिनमा चेम्बर अभियानलाई विस्तार गर्ने बताए ।