१८ पुस/अर्थ र व्यापार – विगत केही दिनअघि परेको भारि वर्षा र हिमपातका कारण नेपाल चीन जोड्ने रसुवागढी केरुङ र तातोपानी खासाको दुबै व्यापारिक भन्सार नाका अवरुद्ध भएका छन् । हिमपातले रसुवा जिल्लास्थित रसुवागढी केरुङ र सिन्धुपाल्चोकस्थित तातोपानी खासाको दुवै नाकाबाट माल वस्तु आयात गत बिहीबार साँझदेखि नै अवरुद्ध भएको ति भन्सार कार्यालयलहरुले जनाएका छन् ।
भारि हिमपातका कारण तत्काल कार्गो कन्टेनर पठाउन कठिन भएको जानकारी चिनियाँ पक्षबाट आएको तातोपानी भन्सार कार्यालयले जनाएको छ । चीनबाट सामान लिएर नेपालतर्फ आउँदै गरेका केही मालबहाक कन्टेनरहरु पनि चीनतर्फको न्यालम र खासामा रोकिएको तातोपानी भन्सार कार्यालय प्रमुख नारद गौतमले जानकारि दिए ।
विगत केहीदिनअघि परेको हिमपात घटेर मौसम सफा नहुँदासम्म सो भन्सार नाका सञ्चालनमा ल्याउन सक्ने अवस्था नरहेको उनले बताए । गौतमका अनुसार यसअघि तातोपानी नाकाबाट दैनिक १० देखि १२ कन्टेनर माल वस्तु नेपाल भित्रिरहेको थियो ।
यसैगरि, चीनतर्फको अर्को प्रमुख व्यापारिक नाका रसुवास्थित रसुवागढी केरुङ भन्सार नाका पनि गत बिहीबार रातिदेखि नै अवरुद्ध भएको सो भन्सार कार्यालयले जनाएको छ । यसअघि दैनिक बिहान ७ वटा र बेलुकी २ वटा कन्टेनर बस्तु तथा सामान नेपाल भित्रिरहेको सो नाका हिमपातका कारण अवरुद्ध भएको रसुवाका प्रमुख जिल्ला अधिकारी नवराज जैसीले जानकारि दिए । उनले तिब्बतको ल्हासास्थित नेपाली महावाणिज्य दूतावास र रसुवागढी भन्सार कार्यालयबाट सो नाका अवरुद्ध भएको जानकारी आएको बताए ।
‘हिमपातका कारण मालवाहक वस्तु नेपालतर्फ पठाउन कठिन भएको भन्ने महावाणिज्य दूतावासबाट लेखेर आएको छ, शनिबार घाम लागेको छ बिस्तारै सहज हुन्छ होला’ रसुवाका प्रमुख जिल्ला अधिकारी जैसीले भने । 
गत १३ पुसको रातिदेखि सुरु भएको भारि वर्षाका कारण रसुवा, सिन्धुपाल्चोक लगायत देशको उच्च पहाडी तथा अधिकांश हिमाली भूभागमा हिमपात भएको थियो । जसका कारण अहिलेसम्म नेपाल चीन जोड्ने यि दुई प्रमुख व्यावापरिक भन्सार नाका अवरुद्ध भएको उनले बताए । 
नेपाल चीन जोड्ने यि प्रमुख दुई भन्सार व्यापारिक नाका समुन्द्री सतहदेखि करिब २ हजार ५ सय मिटर भन्दा उच्च स्थानमा रहेका छन् । सोही कारण हरेक हिउँदे मौसममा यस्तै हिमपातका कारण व्यापारिक कारोबारमा समेत अवरोध हुँदै आईरहेको सम्बन्धीत सरोकारवाला एवं भन्सार कार्यालयहरुको भनाई छ ।