५ पुस /अर्थ र व्यापार – चालु आर्थिक वर्षको वितेका साढे चार महिनामा २९ अर्ब ८५ करोड रुपैयाँको वैदेशिक लगानी भित्रिएको छ । सो लगानी चालु आवको वितेका चार महिना गत १५ मंसिरसम्मको हो । यस अवधीमा भएको कुल विदेशी लगानीमध्ये चीनको हिस्सा सबैभन्दा धेरै देखिएको छ । कुल विदेशी लगानीमध्ये चीनबाट मात्रै ७९ प्रतिशत लगानी भित्रिएको छ ।
उद्योग विभागका अनुसार चालु आर्थिक वर्षको १५ मंसिरसम्ममा २९ अर्ब ८५ करोड रुपैयाँको वैदेशिक लगानी भित्रिएको छ । जसमध्ये चीनबाट मात्रै २३ अर्ब ५४ लाख रुपैयाँ बराबरको लगानी आएको छ । कुल वैदेशिक लगानीमा चीनको हिस्सा ७८.८६ प्रतिशत छ ।
सो अवधिमा कुल १२० उद्योगमा विदेशी लगानी आएको छ । यसमध्ये चीनबाट मात्रै १०१ उद्योगमा लगानी आएको छ । चीनबाट आएको लगानीमध्ये ठूलो हिस्सा सेवामुलक क्षेत्रमा बढी छ ।
उद्योग विभागका अनुसार चालु आर्थिक वर्षमा चीनबाट सेवामुलक क्षेत्रका ३४ उद्योगको लागि ११ अर्ब १० करोड रुपैयाँ बराबरको लगानी आएको छ । सेवामुलक क्षेत्रका ३५ उद्योगमा विदेशी लगानी आएकोमा अर्काे एउटा उद्योगको लागि स्पेनबाट ४ अर्ब ८५ करोड रुपैयाँ बराबरको लगानी प्रतिवद्धता आएको हो । सेवामुलक क्षेत्रका ३५ उद्योगका लागि कुल १५ अर्ब ९५ करोड रुपैयाँ बराबरको लगानी प्रतिवद्धता आएको छ ।
यसैगरि, कृषि तथा वन पैदावारमा आधारित उद्योगमा चीनबाट ४ वटा लगानी प्रतिवद्धता आएको छ । प्रति उद्योगमा १५ करोडका दरले ४ उद्योगमा ६० करोड लगानी प्रतिवद्धता आएको विभागको तथ्यांकमा उल्लेख छ । सो अवधीमा ऊर्जामूलक उद्योगमा नेदरल्याण्डबाट एक उद्योगमा ५ करोड ६० रुपैयाँ, सूचना, सञ्चार तथा प्रसारण प्रविधिमा आधारित ६ उद्योगमा ४५ करोड लगानी आएको छ । जसमा चीनबाट दुई उद्योगमा २५ करोड, बेलायतबाट एक उद्योगमा ५ करोड र अमेरिकाबाट ३ उद्योगमा १५ करोड लगानी प्रतिवद्धता आएको छ ।
त्यसैगरि, उत्पादनमूलक १९ उद्योगमा ३ अर्ब २४ करोड रुपैयाँ लगानी प्रतिवद्धता आएको छ । जसमा चीनबाट १४ उद्योगमा २ अर्ब, भारतबाट ३ उद्योगमा २४ करोड र सिंगापुरबाट १ उद्योगमा एक अर्ब र जापानबाट ५ करोड रुपैयाँ लगानी प्रतिवद्धता आएको छ ।
यसैगरि,पर्यटनसँग सम्बन्धित ५५ उद्योगमा ९ अर्ब ५५ करोड रुपैयाँ प्रतिवद्धता आएको छ । जसमा सबैभन्दा धेरै चीनबाट ४७ उद्योगमा ९ अर्ब १५ करोड लगानी प्रतिवद्धता आएको छ । त्यस्तैगरी, भारतबाट १ उद्योगमा ५ करोड, अमेरिकाबाट ३ उद्योगमा १५ करोड, स्वीटजरल्याण्डबाट, इटाली, फान्स र भितनामबाट एक÷एक उद्योगमा ५÷५ करोड लगानी प्रतिवद्धता आएको विभागले जनाएको छ ।