१० असोज / अर्थ र व्यापार – चालू आर्थिक वर्ष २०७८ / ७९ को बितेका दुई महिनाको अवधिमा नेपालले साढे २ खर्ब बढी व्यापार घाटा बेहोरेको छ । भन्सार विभागको तथ्यांकअनुसार चालू आवको बितेका दुई महिना भदौसम्ममा २ खर्ब ७० अर्ब ४७ करोड ७५ लाख रूपैयाँ बराबरको व्यापार घाटा बेहोरेको हो ।
गत वर्षको सोही अवधिमा नेपालले १ खर्ब ५८ अर्ब ४० करोड ३२ लाख रूपैयाँ बराबरको व्यापारघाटा गरेको थियो । गत वर्षको तुलनामा चालू आवको सोही अवधिमा नेपालले ७० दशमलव ७५ प्रतिशतले व्यापार घाटा बेहोरेको भन्सार विभागको तथ्याङ्कले देखाउँछ ।
नेपालले भदौ महिनासम्ममा ३ खर्ब १४ अर्ब ५१ करोड ७१ बराबरको वस्तु तथा सेवा आयात गरेको छ । गत वर्षको सोही अवधिमा नेपालले १ खर्ब ७८ अर्ब ८४ करोड ६२ लाख रूपैयाँ बराबरको आयात गरेको थियो । गत वर्षको तुलनामा चालू आवमा ७५.८६ प्रतिशतले आयात बढेको छ ।
त्यस्तै, चालू आवमा निर्यातमा पनि गत साउन महिनाकै हाराहारीमा निर्यात बढेको छ । आव २०७७ / ७८ को पहिलो दुई महिनामा नेपालबाट २० अर्ब ४४ करोड ३० लाख रूपैयाँ बराबरको वस्तु तथा सेवा निर्यात गरेको थियो । चालू आवको सोही महिनामा नेपालले ४४ अर्ब ३ करोड ९५ लाख रूपैयाँको निर्यात गरेको छ । जुन ११५.४३ प्रतिशतले बढी हो ।
नेपालले चालू आवको पहिलो महिनादेखि नै उच्च रूपमा आयात निर्यात गर्दै आएको भन्सार विभागको तथ्यांकले उल्लेख गरेको छ । नेपालले दुई महिनाको अवधिमा ३ खर्ब ५८ अर्ब ५५ करोड ६७ लाख रूपैयाँको वैदेशिक व्यापार गरेको छ । गत वर्ष सोही अवधिमा नेपालले १ खर्ब ९९ अर्ब २८ करोड ९३ लाख रूपैयाँको मात्रै वैदेशिक व्यापार गरेको थियो । गत वर्षको तुलनामा चालू आवको वैदेशिक व्यापार ७९.९२ प्रतिशतले बढेको विभागको तथ्यांकमा उल्लेख छ ।
आयात निर्यातको अनुपात हेर्ने हो भने गत वर्षको तुलनामा १८.३७ प्रतिशतले कमी आएको छ । गत वर्ष भदौ महिनासम्ममा औसत आयात÷ निर्यात ८.७५ रहेकोमा चालू आवमा ७.१४ प्रतिशतमा झरेको छ । साथै, सरकारलले उक्त आयातित वस्तु तथा सेवाबाट ८३ अर्ब ५२ करोड ९३ लाख रूपैयाँ राजस्व संकलन गरेको छ ।
त्यसैगरी, नेपालबाबाट भदौ महिनासम्ममा सबैभन्दा बढी सोयाबिन आयल आयात गरेको छ । भदौसम्ममा नेपालले १५ अर्ब ६० करोड रूपैयाँको क्रुड सोयाबिन तेल आयात गरेको छ । दोस्रोमा डिजेल मात्रै १३ अर्ब ९६ करोड २८ लाख रूपैयाँको आयात गरेको छ ।
त्यस्तै, आइरन तथा स्टिल १० अर्ब ५४ करोड ५१ लाख रूपैयाँको, मोबाइल फोन १० अर्ब ३६ करोड ३५ लाख रूपैयाँको, पेट्रोल ८ अर्ब ५५ करोड २५ लाख रूपैयाँको, सुन ८ अर्ब ३५ करोड ७७ लाख रूपैयाँको, एलपीजी ग्याँस ७ अर्ब ९९ करोड २३ लाख रूपैयाँको, सिल्भर ६ अर्ब ६५ करोड ८९ लाख रूपैयाँको, क्रुड पाम तेल ६ अर्ब ४५ करोड २६ लाख रूपैयाँको र आइरन स्टिल ४ अर्ब ८७ करोड ५८ ५८ लाख रूपैयाँको आयात भएको छ ।
नेपालले दुई महिनाको अवधिमा ४४ अर्ब रूपैयाँ बराबरको वस्तु तथा सेवा निर्यात गर्दा आयातिति भटमासको तेल नै उच्च रूपमा निर्यात भएको देखिन्छ । दुई महिनाको अवधिमा नेपालबाट १६ अर्ब ४८ करोड १५ लाख रूपैयाँको मात्रै भटमासको तेल निर्यात भएको छ । दोस्रोमा भारतले पाम तेलको निर्यातमा प्रतिबन्ध फुकुवा गरेसँगै पाम तेल ७ अर्ब ५० करोड ६१ लाख रूपैयाँ, १ अर्ब ५० करोड ३६ लाख रूपैयाँको कार्पेट, १ अर्ब ४५ करोड ८९ लाख रूपैयाँको सूर्यमुखी तेल, १ अर्ब ३३ करोड ५० लाख रूपैयाँको जुट तथा टेक्स्टायल, १ अर्ब ९ करोड ७ लाखको फेल्ट, ९३ करोड ८२ लाखको धागो, ९१ करोड ६७ लाखको अलैंची निर्यात भएको छ ।