७ असोज / अर्थ र व्यापार –  प्रमुख प्रतिपक्षी दल नेकपा एमालेको नाराबाजीकाबीच सरकारले ल्याएको संशोधित बजेट संसद्का दुवै सदनबाट पारित भएको छ । बिहीबार पारित भएको संसोधित नयाँ बजेटलाई अब राष्ट्रपति विद्यादेवी भण्डारीले प्रमाणीकरण गर्नेछिन् । त्यसपछि कार्यान्वयनमा लगिनेछ ।

अघिल्लो सरकारले अध्यादेश मार्फत गत १५ जेठमा ल्याएको १६ खर्ब ४७ अर्ब ५७ करोड रुपैयाँ बराबरको बजेट संशोधन गर्दै अर्थमन्त्री जनार्दन शर्माले गत २५ भदौमा प्रतिस्थापन विधेयक मार्फत फेरि नयाँ संसोधित बजेट ल्याएका थिए । सो विधेयकलाई बिहीबार बसेको राष्ट्रियसभा बैठकले पारित गरेको थियो । त्यसपछि पुनः प्रतिनिधिसभा बैठकमा राष्ट्रियसभाबाट प्राप्त पत्र प्रस्तुत भई पारित गरिएको हो । 
राष्ट्रियसभाबाट पारित भएर आएको सो विधेयकलाई प्रतिनिधिसभाका सभामुख अग्निप्रसाद सापकोटाले अब राष्ट्रपति कार्यालयमा प्रमाणीकरणकालागि पठाउने छन् । त्यसपछि स्वतः कार्यान्वयनमा आउने छ र बजेट होलिडेको संचित कोषको रकम खर्च गर्न नपाउने संवैधानिक बन्देज हट्ने छ । 
नेकपा एमालेको अवरोधकै कारण नेपालको इतिहासमा गत ३१ भदौदेखि सरकारले आफ्नो ढुकुटीमा भएको पैसा समेत (संघीय सञ्चित कोषबाट ) खर्च गर्न नपाउने स्थिति  निम्तिएको थियो । 
अघिल्लो सरकारले अध्यादेशबाट ल्याएको बजेट गत ३० भदौमा नै निष्क्रिय भएको थियो भने वर्तमान सरकारले बजेट होलिडेको अवस्था आउन नदिने गरी समयमै प्रतिस्थापन विधेयक अघि सार्न सकेको थिएन । जसका कारण हाल संवैधानिक अंग तथा उच्च पदमा आसिन व्यक्ति तथा निकायहरू (संघीय सञ्चित कोषमाथि हुने व्ययभार) बाहेक अन्य खर्च रोकिएको अवस्था छ । तर, सदनको दुवै सदनले यस संसोधित बजेट पारित गरेकाले अब राष्ट्रपतिबाट प्रमाणीकरण हुनासाथ सरकारले बजेट खर्च पाउने छ । 
प्रतिनिधिसभाबाट बजेटसँग सम्बन्धित दुई वटा विधेयक पारित भएको हो । बिहीबारको प्रतिनिधिसभा बैठकले आर्थिक विधेयक र राष्ट्र ऋण उठाउने विधेयक पारित गरेको हो । अब सरकारलाई बजेट खर्च गर्न र ऋण उठाउन बाटो खुलेको छ । बिहीबारको बैठक सुरु हुनेवित्तिकै विगतका दिनझैं प्रतिपक्षी दल एमाले सांसदहरुले संसदको वेल घेरेर नाराबाजी गरेका थिए । नारावाजीकैबीचमा सभामुख सापकोटाले संसदको कारबाही अघि बढाएका थिए । सो समय सभामुखले अर्थमन्त्री शर्मालाई अर्थिक विधेयक र राष्ट्र ऋण उठाउने विधेयक पेश गर्न अनुमति दिए र निर्णयार्थ पनि पेश गरे । त्यसपछि सभामुख सापकोटाले विधेयक बहुमतले पारित भएको घोषणा गरेका थिए । पेस भएका दुबै विधेयक पारित भएपछि प्रतिनिधिसभाको अर्को बैठक आगामी ११ असोजको दिउँसो २ बजेसम्मकालागि स्थगित गरिएको छ ।