२५ भाद्र / अर्थ र व्यापार– शुक्रबार बसेको संघिय संसद्को प्रतिनिसभाको बैठकमा बजेटसम्बन्धी तीन विधेयकमाथि छलफल शुरू भएको छ । जसमध्ये सभामुख अग्निप्रसाद सापकोटाले आर्थिक अध्यादेश, २०७८ बहुमतले पारित भएको घोषणा गरेका छन् ।

प्रतिपक्षी दल नेकपा (एमाले)का सांसदहरूको जारी नारावाजीबीच सभामुख सापकोटाले प्रेम सुवाललाई आर्थिक अध्यादेश, २०७८ लाई अस्वीकार गरियोस् भन्ने प्रस्ताव राख्न दिएका थिए ।
त्यस्तै सुवालपछि अर्थमन्त्री जनार्दन शर्माले आर्थिक अध्यादेश, २०७८ लाई स्वीकार गरियोस् भन्ने प्रस्ताव पेश गरेका थिए । अघिल्लो सरकारले ल्याएको बजेट अध्यादेश विस्थापित गर्न वर्तमान सरकारले आर्थिक प्रतिस्थापन विधेयक ल्याउन लागेको हो । शुक्रबार संसदमा आर्थिक अध्यादेश, राष्ट्र ऋण उठाउने अध्यादेश र विनियोजन अध्यादेश स्वीकृत गर्न प्रस्ताव पेश हुने भएको छ ।
बैठक १५ मिनेटका लागि पुनः स्थगित
प्रतिनिधिसभाको शुक्रबार बसेको दोस्रो बैठक पनि १५ मिनेटका लागि पुनः स्थगित भएको छ । सभामुख अग्निप्रसाद सापकोटाले बैठक १५ मिनेटका लागि स्थगित गरेका हुन् ।
प्रतिपक्षी नेकपा एमालेको अवरोधबीच सभामुख सापकोटाले आजको कामाकारबाही सञ्चालन गरेका थिए । बैठकले आर्थिक अध्यादेश, राष्ट्र ऋण उठाउने अध्यादेश, विनियोजन अध्यादेश स्वीकृत पनि गरेको छ । शुक्ररबारको प्रतिनिधिसभाको बैठक सुरु हुने बित्तिकै प्रतिपक्षी दल एमालेका सांसदले चर्को नारावाजीसहित संसद्मा अवरोध गरेपछि सो बैठक १५ मिनेटका लागि स्थगित भएको थियो ।