४ पुस / अर्थ र व्यापार – निजी क्षेत्रका वायुसेवा कम्पनीहरूको छाता संगठन वायुसेवा सञ्चालक संघ, नेपालको अध्यक्षमा पुनः सिम्रिक एयरका कार्यकारी अध्यक्ष क्याप्टेन रामेश्वर थापा निर्वाचित भएका छन् । संघको २१औं वार्षिक साधारण सभाबाट थापा पुनः संघको अध्यक्षमा निर्विरोध चयन भएका हुन् ।  संघको सो वार्षिक साधारण सभामार्फत आगामी दुई वर्षका लागि संघले सिम्रिक एयरका कार्यकारी अध्यक्ष क्याप्टेन थापाको अध्यक्षतामा पुनः नयाँ कार्यसमिति चयन गरेको हो । 
क्याप्टेन थापाले नेपाली हवाई क्षेत्रमा विगत दुई दशकदेखि हेलिकोप्टर कम्पनी सञ्चालन गर्दै आएका छन। थापा सन् २००२ देखि हेलिकोप्टर प्रशिक्षक पाइलटका रुपमा पनि क्रियाशील छन्। संघमा पुनः अध्यक्षमा निर्वाचित भएका थापा सिम्रक एयरका सञ्चालक हुन्। 
थापाको नेतृत्वमा दुई वर्षका लागि संघको १३ सदस्यीय नयाँ कार्यसमिति चयन भएको छ। सो कार्यसमितिको उपाध्यक्षमा यति एयरलाइन्सका अनोज रिमाल, सौर्य एयरलाइन्सका गोपाल भट्टराई, अल्टिच्यूड एयरका निमानुरु शेर्पा निर्वाचित भएका छन ।  यसैगरि, महासचिवमा समिट एयरका मनोज कार्की, सचिवमा मनाङ एयरका राजु न्यौपाने, कोषाध्यक्षमा बुद्ध एयरका रुपेश जोशी निर्वाचित भएका छन । त्यसैगरि, संघको अन्य कार्यसमिति सदस्यहरुमा हेली एभरेष्टका फुरु ग्याल्जे शेर्पा, प्रभु हेलिकोप्टरका सुवास अमात्य, श्री एयरलाइन्सका अनिल मानन्धर, गुण एयरलाइन्सका प्रज्वल थापा, कैलास हेलिकोप्टरका श्रीहरि कुईकेल र एयर डाइनेष्टिका बालकृष्ण पण्डित निर्वाचित भएका छन्।
सो साधरणसभामा संस्कृति, पर्यटन तथा नागरिक उड्यन मन्त्री प्रेम बहादुर आलेले आन्तरिक उडानको सुरक्षाका लागि सरोकारवाला निकायहरुले सहकार्य गर्नुपर्ने बताए। उनले उडानका क्रममा हुने बाधा अवरोधलाई कम गर्न र उडानलाई सुरक्षित बनाउन नागरिक उड्यन प्राधिकरणले बजेट छुट्टाएको जानकारी दिए ।
पर्यटन मन्त्रालयका सचिव महेश्वर न्यौपानेले सरकारले परिस्थित अनूकल अपनाउने सुरक्षा मापदण्डहरुलाई वायु सेवा सञ्चालकहरुले सहजका साथ लिनुपर्ने बताए । 
नेपाल नागरिक उड्डयन प्राधिकरणका कार्यकारी निर्देशक राजकुमार क्षेत्रीले सुरक्षित उडानका लागि प्राधिकरण सजग रहेको र निजी क्षेत्रसँग मिलेर अघि बढ्ने बताए ।
संघका नवनियुक्त अध्यक्ष क्याप्टेन रामेश्वर थापाले वायुसेवाको सुरक्षास्तरलाई अझै उचाईमा पु¥याउने र नेपाली वायुसेवाको सुरक्षा सूदृढीकरणलाई बढीभन्दा बढी विश्वासिलो बनाउँदै जाने बताए । आफ्नो कार्यकालमा उडान सुरक्षाको प्रतिबद्धता दोहोराउँदै उनले मन्त्रालय, प्राधिकरण लगायतका नियामक निकायहरुसँग हातेमालो गर्दै नेपाली हवाई उद्योगमा रहेका विभिन्न समस्यालाई निराकरण गर्ने प्रतिवद्धता व्यक्त गरे । यसैगरी, उनले हवाई सञ्चालन उद्योग कोभिड महामारीको चपेटामा परी उठ्न नसक्नेगरी अप्ठेरोमा परेको र विगत एक वर्षदेखि लगातार हवाई इन्धनमा भएको बढोत्तरीले झनै कठिनाइ थपिँदै गएको बताए । हाल अन्तर्राष्ट्रिय पर्यटकको आगमन नै बन्द भई उड्डयन क्षेत्र शिथिल भइरहेको अवस्थामा पुनः कोरोनाको नयाँ भेरियन्ट ओमिक्रोन भाइरसको प्रभावमा परी अझै अप्ठेरा दिन आउन सक्ने बताए । थापाका अनुसार विमानस्थलमा चराचुरुंगी एवं जनावरको उपस्थितिले पनि नेपालको हवाई सुरक्षामा चुनौती बढेको घटनासमेत बढिरहेको र क्रमशः विमानहरू भूमिस्थ भइरहेकोमा चिन्ता व्यक्त गरे । 
सो वार्षिक साधारण सभामा महासचिवको प्रतिवेदन, कोषाध्यक्षको प्रतिवेदन पेस गरिएको थियो । सोही अवसरमा वायुसेवा कम्पनीहरूको अध्यक्ष, प्रबन्ध निर्देशक, प्रमुख कार्यकारी अधिकृत, कार्यकारी प्रमुख तथा उच्च पदस्थ पदाधिकारीहरूको उपस्थिति रहेको थियो । 
यसरी विमान भूमिस्थ हुँदा अपरेसन आम्दानी पनि घटिरहेको भन्दै उनले यस्तो अवस्थाका कारण हवाई सुरक्षाका यी विषयमा सरकार एवं नेपाल नागरिक उड्डयन प्राधिकरणले समस्या न्यूनीकरण तर्फ ध्यान दिनुपर्ने बताए ।