९ फागुन/ अर्थ र व्यापार- काठमाडौँ । संघीय सांसदहरुको सपथ ग्रहण फागुन २० गतेका लागि तोकिएको छ । संघीय संसद सचिवालयले सूचना सार्वजनिक गर्दै फागुन २० गतेका लागि सपथ ग्रहण कार्यक्रम राखिएको जानकारी दिएको छ ।
प्रतिनिधिसभाका जेष्ठ सदस्यले सांसदहरुलाई शपथ ग्रहण गराउने व्यवस्था छ । सांसदहरुलाई संसद् सचिवालयले राष्ट्रिय पोशाक वा आ–आफ्नो सांस्कृतिक पहिचान झल्कने पोशाकमा निर्वाचन आयोगबाट प्राप्त प्रतिनिधिसभा र राष्ट्रियसभाका सदस्यलाई प्रमाणपत्रसहित आउन आग्रह गरेको छ ।
कुनै पनि सांसदले मातृभाषामा शपथ लिन चाहेमा पनि व्यवस्था गरेको सचिवालयले जनाएको छ । तर तीनदिन अघि नै मातृभाषामा अनुवाद गरी प्रतिसहित संसदका महासचिवलाई बुझाउनुपर्ने हुन्छ । सचिवालयले प्रतिनिधिसभाका सदस्यहरुलाई फागुन २० गते ४ बजे र राष्ट्रियसभाका लागि ५ बजे समय तोकेको छ । संघीय संसदको पहिलो अधिवेशन फागुन २१ का लागि आह्वान गरिएको छ ।
तपाईको प्रतिक्रिया