निर्वाचनको समय नजिकिएसँगै आयोगमा ६४ दलले बुझाए ३४२४ जनाको बन्दसूची

उम्मदेवारले गर्ने खर्चको सीमा पनि तोकियो

880 पटक पढिएको

१५ पुस/अर्थ र व्यापार – आगामी २१ फागुनका लागि तय भएको प्रतिनिधिसभा सदस्यको निर्वाचन अन्तर्गत समानुपातिक तर्फ ६४ वटा दलले निर्वाचन आयोगमा उम्मेदवारको बन्दसूची बुझाएका छन् ।
निर्वाचनको मिति २१ फागुन आउन अब करिब २ महिना मात्र बाँकी छ । सो निर्वाचनकालागि ६४ दलबाट ३ हजा ४२४ जना उम्मेदवारको नाम बुझाइएको छ । ६४ वटा दलमध्ये ५४ वटा दल आ–आफ्नो चुनाव चिह्नमा प्रतिस्पर्धामा उत्रिदैछन् । १० वटा दलले भने अरु दलको चुनाव चिह्नबाट लड्दैछन् ।
जसकालागि निर्वाचन आयोगले उम्मेदवारले गर्ने खर्चको सीमा तोकेको छ । निर्वाचन आयोगले सुगम मानिएका जिल्लाका हकमा र दुर्गम मानिएका जिल्लाका हकमा फरकफरक खर्च सीमा निर्धारण गरेको छ ।
आयोगका अनुसार काठमाडौंका ५ वटा निर्वाचन क्षेत्रका उम्मेदवारले अधिकतम २५ लाख खर्च गर्न पाउनेछन् । त्यसमा काठमाडौं क्षेत्र नं १, ३, ६, ७ र ८ रहेका छन् । यसैगरी, १७ वटा निर्वाचन क्षेत्रका उम्मेदवारले अधिकतम २७ लाख बराबरको खर्च गर्न पाउने सीमा निर्धारण गरिएको छ ।
त्यस्तै, ६५ वटा निर्वाचन क्षेत्रका उम्मेदवारले अधिकतम २९ लाख बराबर खर्च गर्न पाउनेछन् । आयोगका अनुसार ५२ वटा निर्वाचन क्षेत्रका उम्मेदवारले अधिकतम ३१ लाख, २६ वटा निर्वाचन क्षेत्रका उम्मेदवारले अधिकतम ३३ लाख बराबरको खर्च गर्न पाउनेगरी सीमा निर्धारण गरिएको आयोगका प्रवक्ता नारायणप्रसाद भट्टराईले जानकारी दिए ।
निर्वाचन आयोगका अनुसार उम्मेदवारले खर्च गर्दा बैंक वा वित्तीय संस्थामा छुट्टै खाता खोली सोही खाताबाट खर्च गर्नुपर्नेछ । त्यसरी खर्च गर्दा निजकोतर्फबाट खर्च गर्ने जिम्मेवार अधिकारी तोकी निजको नाम नामेसीसहितको विवरण भने निर्वाचन अधिकृतको कार्यालयमा पेस गर्नुपर्नेछ ।
आगामी निर्वाचनकालागि चुनावमा उठ्ने उम्मेदवारले तोकेको खर्चको हदभित्र रहेर निर्वाचन खर्च गर्न र प्रतिनिधिसभा सदस्य ऐनबमोजिम निर्वाचन खर्चको विवरण निर्वाचन परिणाम घोषणा भएको मितिले ३५ दिनभित्र निर्वाचन कार्यालयमा पेस गर्नुपर्नेछ । यस्तो आचारसंहिता लागु भएपछि अहिले देश निर्वाचनमय बनिरहेको छ ।

तपाईको प्रतिक्रिया

सम्बन्धित शीर्षकहरु