२३ असार/अर्थ र व्यापार– नेपाली कांग्रेसका राष्ट्रियसभा सदस्य जितेन्द्र देवले नेपालले खोप ल्याउन नसक्नुमा सरकारको कुटनीतिक असफलता भएको बताएका छन् ।

राष्ट्रियसभाको बुधबार बसेको बैठकमा विशेष समय लिएर बोल्दै देवले बंगलादेश, पाकिस्तान, श्रीलंका र भुटानले अमेरिका र युरोपेली देशको सहयोगमा खोप ल्याइरहेका बेला नेपालले नसक्नु सरकारको कुटनीतिक असफलता भएको बताएका हुन् ।

देवले अमेरिकी सरकारको सहयोगमा बंगलादेश र पाकिस्तानले मोडेर्ना कम्पनीको २५ लाख डोज, भुटानले डेनमार्कबाट २५ लाख डोज र श्रीलंकाले अमेरिकी सरकारको सहयोगमा फाइजरको खोप ल्याएको भन्दै नेपाल सरकार खोप ल्याउन असफल भएको बताएका हुन्।

देवले नेपालको पनि अमेरिका र युरोपेली देशसंग दशकौंदेखि परम्परागत र मित्रगत सम्बन्ध रहेको भन्दै नेपालले किन खोप ल्याउन नसकेको भनी प्रश्न गरेका छन् । उनले कमिसनकै कारण नेपालले किनिसकेको सेरम इन्ष्टिच्युटको खोप समेत ल्याउन नसकेको टिप्पणी गरे । 

राष्ट्रियसभा सदस्य देवले राजनीतिक नेतृत्वलाई कूटनीतिक ज्ञान नहुँदा देशको कूटनीति असफल भएको बताए । उनले प्रधानमन्त्री वा परराष्ट्रमन्त्रीले गर्नुपर्ने पहल राष्ट्रपतिमार्फत विभिन्न राष्ट्रप्रमुखलाई खोपका लागि चिठी लेखाएर सरकारले बचपना कूटनीति गरेको बताए ।