१४ मंसिर / अर्थ र व्यापार – नेकपा एमालेको अध्यक्षमा केपी शर्मा ओली सान्दार मतपरिणाम सहित पुनः विजयी भएका छन् । चितवनमा आयोजित १० औं राष्ट्रिय महाधिवेशनबाट ओली पुनः आगामी चार वर्षे कार्यकालका लागि अध्यक्षमा निर्वाचित भएका हुन् ।
ओलीले १८०८  मत पाएर अध्यक्ष हुँदा अर्का प्रत्यासी भीम रावलले जम्मा २२३ मत पाएका  छन ।  यो समाचार तयार पार्नुजेलसम्म निर्वाचन समितिले सो मत परिणामको औपचारिक घोषणा भने गरेको छैन ।
सर्वसम्मत नेतृत्व चयन गर्ने प्रयास सफल नभएपछि मंगलबार बिहान निर्वाचन भएको थियो । एमालेका २ हजार १ सय ५३ प्रतिनिधिहरुमध्ये २ हजार ९६ मत खसेको थियो ।
नवौं महाधिवेशनमा निर्वाचित भएदेखि एमालेको नेतृत्व ओलीले सम्हाल्दै आएका छन् । नवौं महाधिवेशनबाट रावल उपाध्यक्ष बनेका थिए । १० औं महाधिवेशनमा अध्यक्षमा उम्मेदवारी दिएपछि रावलले अध्यक्ष नबने केन्द्रीय सदस्यमा पनि नरहने घोषणा गरेका थिए । अघिल्लो नवौं महाधिवेशनमा माधव नेपाललाई झिनो अन्तरले पराजित गरेका ओलीले यसपाली रावलमाथि सहज जित हासिल गरेका हुन् । अबको केही समयमा निर्वाचन समितिले औपचारिक  रुपमा मतपरिणामबारे जानकारी गराउँने निर्वाचन समितिका सदस्य बाबुराम दाहालले जानकारी दिए ।