१० पुस/अर्थ र व्यापार– दक्षिण कोरियाको प्रवासी श्रमिक कोटा निर्धारण समितिले सन् २०२१ लागि इपिएसअन्तर्गत लैजाने प्रवासी श्रमिकको कोटा निर्धारण गरेको छ ।

समितिको बुधबार बसेको बैठकले नेपालसहित अन्य १६ मुलुकबाट सन् २०२१ लागि ५२ हजार कोटा निर्धारण गरेको हो । यो संख्या २०२० को तुलनामा चार हजारले कम हो ।

कोरोना महामारीको संक्रमणका कारण सन् २०२० को कोटामध्येका ३० हजार ९०९ प्रवासी श्रमिक रोजगारीका लागि कोरिया जान पाएका छैनन् ।

सन् २०२१ मा तोकिएको ५२ हजारमध्ये उत्पादन क्षेत्रमा ३७ हजार ७००, कृषि क्षेत्रमा छ हजार ४००, मत्स्यपालन क्षेत्रमा तीन हजार, निर्माण क्षेत्रमा एक हजार ८००, सेवा क्षेत्रमा (पुरानो सामान बटुल्ने छान्नेमा) १०० जना तोकिएको छ ।यो कोटामध्ये ४० हजार नयाँ आउनेछन् भने १२ हजार कमिटेड (प्रतिबद्ध पुनः प्रवेश) श्रमिक आउनेछन् ।

साथै प्रवासी श्रमिक कोटा निर्धारण समितिको बैठकले अप्रिलसम्ममा २२ हजारको रोजगार अनुमतिपत्र जारी गरिने निर्णय समेत गरेको छ ।