२३ असार/अर्थ र व्यापार– नेपाल वैदेशिक रोजगार व्यवसायी संघले आर्थिक चलखेल गर्नका लागि व्यापारिक संस्था ‘कतार भिसा सेन्टर’ (क्युभिसी) खडा गरेको भन्दै बिरोध गरेका छन् ।

संघले कतार भिसा सेन्टर (क्युभिसी) खडा गरी एकाधिकारका लागि व्यापारिक संस्था खडा गरिएको भन्दै आन्दोलनमा उत्रने चेतावनी दिएको हो ।

यसअघि नेपाल सरकारबाट मान्यताप्राप्त जुनसुकै स्वास्थ्य संस्थाबाट स्वास्थ्य परीक्षण गरी श्रम स्वीकृतिलगायत प्रक्रिया पूरा गरी कतारमा कामदार जाने गरिएकोमा हाल मिलेमतोमा आर्थिक चलखेल गर्ने उद्धेश्यले कतार भिसा सेन्टर (क्युभिसी)खडा गरेको बताएका छन् ।

संघले सीमित व्यक्तिको अघोषित मिलेमतोमा व्यापक आर्थिक चलखेल भएको र सिन्डिकेट गर्न लागिएको भन्दै यसका विरुद्ध युवा कामदार र व्यवसायीसहित चरणवद्ध रुपमा आन्दोलनमा उत्रने जनाएको छ ।

नेपाल वैदेशिक रोजगार व्यवसायी संघका अध्यक्ष कमल तामाङले कतार भिसा सेन्टर (क्युभिसी) को आवश्यकता र क्रियाकलापको बारेमा यथाशिघ्र छानबिन गर्न सरकारसंग माग गरेका छन् ।

तामाङले दुरदराजबाट विदेश जान सपना देखेर आएका युवाहरु २० दिनसम्म क्वियु भिसीको लागि डेट कुरेर बस्दा उल्टै ऋणमा डुबेको बताए ।

संघका द्वितीय उपाध्यक्ष कमलदेव मल्लले क्युभिसीले नेपाली कामदारमाथि ज्यादती गरेको भन्दै एकपक्षीय रुपमा व्यवसायी र कामदारको हितविपरित आर्थिक भार थप्ने तथा अघोषित सिन्डिकेट कायम गर्ने नियत प्रष्ट देखिएको बताए ।