३ पुस/अर्थ र व्यापार– वैदेशिक रोजगार विभागले गरेको तीन महिना लामो छड्के अनुगमनका क्रममा ६० वटा मध्ये ४५ वटा म्यानपावर कम्पनीले अबैध काम गरेको भेटिएको छ । 

श्रम रोजगार पत्रकार समूहले आयोजना गरेको स्वच्छ वैदेशिक रोजगारीबारेको भर्चुअल कार्यक्रममा विभागका महानिर्देशक कुमारप्रसाद दहालले अनुगमनमा ४५ वटा म्यानपावर कम्पनीले अबैध रुपमा काम गरेको भेटिएको बताए । 

महानिर्देशक दाहालले अबैध रुपमा काम गरेको भेटिएको सबै कम्पनीको कारोबार रोक्का गरेर कारवाही गरिएको जानकारी दिए । उनले व्यवसायिक वातावरण बिगार्ने नभई उजुरी आएका ठाउँमा पीडितलाई न्याय दिने उद्देश्यसहित अनुगमन गरिएको बताए ।

महानिर्देशक दाहालका अनुसार खाडी देशमा श्रमिक पठाउन म्यानपावर कम्पनीहरुले  ७ लाखसम्म असुल्ने गरिएको पाइएको जानकारी दिए । 

दाहालले संस्थागतभन्दा व्यक्तिगत ठगी मौलाए भन्दै तलब राम्रो हुने, कोटा सीमित भएको र सम्पर्कमा आएको व्यक्ति नगए अर्को जाने जस्ता प्रलोभन र दबाव बनाएर ठग्ने गरिएको बताए ।

महानिर्देशक दाहालले श्रमिक पनि आफ्नो योग्यता, कामको प्रकृति, तलब, सेवा सुविधा लगायतका विषयमा सचेत हुन नसक्दा बढी समस्या आएकोे बताए ।