९ असोज/अर्थ र व्यापार– दक्षिण कोरियाले हाल इपिएस नियममा भएका केही बुँदालाइ संशोधनका लागि श्रम मन्त्रालयमार्फत संसदमा पेश गरेको छ ।
हाल कोरियामा कम्पनीको कारणबाहेक कार्यस्थल परिवर्तन गरी चार वर्ष १० महिना भिसा सकिएर स्वदेश फर्किएपछि पुनः ‘कमिटेड’ श्रमिकका रूपमा आउन नपाउने नियम छ ।
संशोधनका लागि प्रस्तावित बुंदाहरु संसदबाट पारित भए कार्यस्थल परिवर्तन गरेको श्रमिक पनि ‘कमिटेड’ भई कोरियामा सहज तरिकाले पुनः रोजगारी प्राप्त गर्न सक्नेछन् ।
तर आफूले पहिले काम गरिरहेकै क्षेत्रमा नयाँ काममा लाग्नु पर्ने, भाषा र कामको दक्षता आदि पूरा गरी उक्त श्रमिकले अर्को कम्पनीमा कम्तीमा पनि एक वर्ष काम गरेको हुनुपर्नेछ ।
यौन दुर्व्यवहारमा परी कार्यस्थल परिवर्तन गरेका श्रमिकले अर्को कम्पनीमा एक वर्ष नपुगे पनि सम्बन्धित निकायको सिफारिसमा पुनः ‘कमिटेड’ श्रमिकका रूपमा आउन पाउने कानूनसमेत संशोधनको तयारी रहेको छ ।
यसअघि एउटै कम्पनीमा लगातार चार वर्ष १० महिना काम गरेर स्वदेश फर्की पुनः कमिटेड श्रमिकको रुपमा त्यही कम्पनीमा आउनका लागि तीन महिनापछि मात्र आउन पाउने हालको व्यवस्थालाई संशोधन गर्दै एकै महिनामा आउन पाउने व्यवस्था गर्ने भएको छ ।
प्रवासी श्रमिक युनियनका अध्यक्ष उदय राईले बिनाशर्त स्वेच्छाले कर्यस्थल परिवर्तन गर्न पाउनुपर्ने कानून बनाउन सबै प्रवासी श्रमिक एकजुट हुन आवश्यक भएको बताए ।
तपाईको प्रतिक्रिया