२४ जेठ / अर्थ र व्यापार - प्रधानमन्त्री रोजगार कार्यक्रमअन्तर्गत सिन्धुलीको तिनपाटन गाउँपालिकाले २ सयभन्दा बढी युवालाई रोजगारी दिएको छ । गाँउपालिकाले रोजगारीको माग गर्दै फारम भरेका युवामध्ये अहिले पहिलो चरणमा २४० जना युवालाई रोजगारी दिएको हो । गाउँपालिकाको वडा नम्बर १० र ११ को सिमानामा पर्ने भालु खोलामा कल्भर्ट निर्माणका लागि हाजिरीमा उनीहरूलाई काम लगाइएको रोजगार संयोजक बरुण आले मगरले बताए । उनका अनुसार पहिलो दिन २४० जनालाई एकै पटक काममा लगाइएको थियो । दोस्रो दिनदेखि ३०–३० जनाको समूह बनाएर काम गरिरहेका छन् । गत मंगलबारदेखि सुरु भएको सो योजनाको काम अवधिभर ३०–३० जनाको ८ वटा समूहले काम गर्नेछन् । त्यो ३० जनाको समूहलाई पनि दुई समूहमा १५–१५ जनालाई पालै पालो काममा खटाइएको रोजगार संयोजक आले मगरले बताए । निवदेन दिएका २४० जनालाई नै रोजगारी प्रदान गरिएको छ ।
गाउँपालिकाको कार्यालय जाने मुख्य सडकमै पर्ने भालुखोलामा ह्युमपाइप राखेर कल्भर्ट निर्माणका गर्ने गाउँपालिकाको निर्णय अनुरुप नै बेरोजगार युवालाई काममा खटाइएको बताइएको छ । बर्से्नि वर्षायाममा सडक अवरुद्ध हुँदा सवारी आवागमन नै बन्द हुने समस्यालाई मध्यनजर गरेर उनीहरूमार्फत नै सडकमा ह्युमपाइप राख्ने काम भइरहेको गाउँपालिका अध्यक्ष कर्णबहादुर मगरले बताए । प्रधानमन्त्री रोजगार कार्यक्रमका लागि गाउँपालिकामा कुल ३७ लाख रुपैयाँ आएको छ । जसमा २५ प्रतिशत रकम सडक स्तरोन्नतिका लागि खर्च गरिने र ७० प्रतिशत रकम कामदारलाई ज्यालाका लागि छुट्याइएको उनले बताए । उनका अनुसार कामदारहरूलाई प्रतिदिन ७ सयदेखि १ हजार रुपैयाँ दिइने गरिएको छ । हेल्परलाई ७ सय रुपैयाँ र मिस्त्रीलाई १ हजार रुपैयाँको व्यवस्था गरिएको गाउँपालिकाले जनाएको छ ।
यसैबीच, तिनपाटन गाउँपालिकामा रोजगारीको माग गर्दै फाराम भर्नेको संख्या उत्साहजनक रहेको बताइएको छ । नेपाल सरकारले बेरोजगारी समस्या हटाउन स्थानीय तहमै रोजगारी दिन बेरोजगारहरूको लगत संकलन सुरु गरेसँगै तिनपाटन गाउँपालिकामा हालसम्म झण्डै ८ हजार जनाले फाराम भरेको रोजगार संयोजक बरुण आले मगरले बताए । जेठ मसान्तसम्म फारम भर्न मिल्ने भएकाले यो संख्या अझै बढ्न सक्ने आंकलन गरिएको छ । १८ वर्षदेखि ५९ वर्षसम्मका युवा तथा प्रौढ उमेरका महिला तथा पुरुषले रोजगारी पाऊँ भन्दै फारम भर्ने तथा निवेदन दिने काम भइरहेको जिल्लाका स्थानीय तहहरूले बताएका छन् । मुलुकमै रोजगारी दिने र युवाहरूलाई विदेश नपठाउने नीति लिएर बेरोजगार युवायुवती तथा वयस्कको लगत संकलन सुरु गरेसँगै सिन्धुलीमा मात्रै हजारौं बरोजगारले फाराम भरेका छन् ।
तपाईको प्रतिक्रिया