२६ चैत/अर्थ र व्यापार – नेपाल वैदेशिक रोजगार व्यवसायी संघले हालै खरिद गरेको नयाँ प्रशासनीक भवनको सोमबार औपचारिक उद्घाटन गरिएको छ । श्रम,रोजगार तथा सामाजिक सुरक्षामन्त्री शरतसिंह भण्डारीले काठमाडौको सिफलस्थित सो भवनको औपचारिक उद्घाटन गरेका हुन ।
संघका अध्यक्ष राजेन्द्र भण्डारीको संयोजकत्वमा संघले हाललै काठमाडौंको सिफलचौर अगाडि साँढे ३ तलाको ६ आना १ दाम क्षेत्रफलमा निर्मित सो भवन खरिद गरेको थियो । सो भवन व्यवसायीहरुबाट आर्थिक सहयोग संकलन गरेर खरिद गरिएको थियो ।
नयाँ भवन उद्घाटन विशेष कार्यक्रममा श्रम, रोजगार तथा सामाजिक सुरक्षामन्त्री भण्डारीले संघका अध्यक्ष राजेन्द्र भण्डारीले आफ्नो कार्यकालमा संघको नयाँ प्रशासनिक भवन खरिद गर्नुकासाथै महत्वपुर्ण कार्यहरु गर्न सफल भएकोमा आभार व्यक्त गरे ।
यसैगरी, मन्त्री भण्डारीले संघको आगामी २९ चैतमा हुने निर्वाचनले संघलाई हाक्न सक्ने सक्षम नेतृत्व चयन गरोस भन्दै शुभकामना समेत व्यक्त गरेका थिए । आफूले अहिलेको संघ कार्यसमितिसँग लामो समय सहकार्य गर्न पाएको धारणा राख्दै मन्त्री भण्डारीले वैदेशिक रोजगार व्यवसाय मानव संसाधनलाई अन्तर्राष्ट्रिय बजारकालागि तयार गर्ने संसारकै सबैभन्दा सम्मानजनक पेशा रहेको समेत बताए ।
संघका अध्यक्ष भण्डारीले संघ स्थापनाको ३२ वर्षपछि पहिलोपल्ट आफ्नै प्रशासनिक भवनको प्रांगणमा कार्यक्रम गर्न पाउँदा अत्यन्तै गौरवान्वित महशुस भएको बताए । यस भवन खरिदका लागि सम्पुर्ण व्यवसायीले उत्साहपूर्ण सहयोग गरेको जानकारी गराउँदै उनले सहयोगी सम्पुर्ण दाताहरुलाई धन्यवाद व्यक्त गरे ।
आफ्नै भवन खरिद गर्नेक्रममा कतिपय व्यवसायीले आफ्नो कार्यकाल असफल बनाउन विरोध समेत गरेको बताउँदै अध्यक्ष भण्डारीले असन्तुष्ट व्यवसायीलाई पनि संघमा एक्यबद्ध हुन आग्रह गरे ।
संघका प्रथम उपाध्यक्ष डिकबहादुर खत्री (कुमार)ले संघले ३२ वर्षदेखि देखेको आफ्नै प्रशासनिक भवनको सपना वर्तमान कार्यसमितिले पुरागर्न सफल भएको बताए । वर्तमान नेतृत्वको अथक प्रयास पूर्व अध्यक्षहरुको गाइडलाइन र सम्पुर्ण व्यवसायीको सााथ र सहयोगका कारण अहिले संघको आफ्नै भवन हुन सफल भएकोमा खुसी व्यक्त गरे । उनले भवन खरिद गर्दा केही रकम अझै अपुग भएको र सम्पुर्ण व्यवसायीलाई थप सहयोग गर्न समेत आग्रह गरे ।
संघका महासचिव मेघनाथ भूर्तेलले सम्पुर्ण व्यवसायीको साथ र सहयोगले संघले इतिहासमै पहिलोपटक आफ्नै प्रशासनिक भवन खरिद गर्न सफल भएको भन्दै सम्पुर्ण सहयोगी व्यवसायीलाई धन्यवाद व्यक्त गरे ।
नेपाल उद्योग वाणिज्य महासंघका वस्तुगत तर्फका उपाध्यक्ष हेमराज ढकालले संघका अध्यक्ष भण्डारीको नेतृत्वले ऐतिहासिक काम गर्न सफल भएको बताए । उनले आगामी दिनमा संघ नेतृत्वले अझै धेरै राम्रा काम गर्दै जाओस भन्दै सफलताको शुभकामना व्यक्त गरे ।