२६ फागुन/अर्थ र व्यापार – श्रम, रोजगार तथा सामाजिक सुरक्षा मन्त्रालयको आयोजनामा पाँचौं राष्ट्रिय श्रम तथा रोजगार सम्मेलन सुरु भएको छ ।
सोबारदेखि काठमाडौंको होटल याक एण्ड यतिमा सुरु भएको दुईदिने सो सम्मेलनको उदघाटन प्रधानमन्त्री केपी शर्मा ओलीले गरेका हुन् । श्रम मन्त्रालयले ‘उत्पादन र उत्पादकत्व विस्तार, आन्तरिक रोजगारीको दिगो आधार’ भन्ने नारासहित सुरु गरेको सो दुईदिने सम्मेलन मंगलबार सम्पन्न हुने छ ।
सो सम्मेलनमा प्रधानमन्त्री ओली, श्रम, रोजगार तथा सामाजिक सुरक्षामन्त्री शरतसिंह भण्डारी, प्रधानमन्त्रीका सल्लाहकार विष्णु रिमाल र डा. युवराज खतिवडा लगायत सहभागी भएका थिए ।
यस सम्मेलन विशेषगरि नेपालमा श्रम शक्तिको उपयोग गर्न सिर्जनात्मक रोजगारी बढाउने क्षेत्रको पहिचान तथा प्रवद्र्धन र वैदेशिक रोजगारीबाट प्राप्त सीप, ज्ञान र पुँजीको यथोचित प्रयोगमा केन्द्रित रहने श्रम, रोजगार तथा सामाजिक सुरक्षा मन्त्रालयले जनाएको छ ।
सम्मेलनमा रोजगारी सिर्जना गर्ने भूमिकामा रहेका नेपाल उद्योग बाणिज्य महासंघ, नेपाल होटल संघ, नेपाल वैदेशिक रोजगार व्यवसायी संघ, ट्रेड युनियन प्रतिनिधि, सामाजिक सुरक्षा कोष, वैदेशिक रोजगार बोर्ड, नेपाल सुन–चाँदी व्यवसायी संघ, रिटर्नी कामदारलगायत करिब ३ दर्जन संस्था र विज्ञहरूसहित ५ सय जनाको सहभागिता रहने मन्त्रालयले जनाएको छ ।
यस सम्मेलनबाट प्राप्त सुझावलाई आगामी आन्तरिक रोजगार प्रर्वधन दशवर्षे रणनीतिक योजनामा समावेश गरिने मन्त्रालयका प्रवक्ता एवं सहसचिव डण्डुराज घिमिरेले जानकारी दिए ।
सम्मेलनमा रोजगारी र उत्पादनशीलता अभिवृद्धिसँग सम्बन्धित तीनैतहका सरकार, निजी क्षेत्र, ट्रेड युनियन, श्रम तथा रोजगार विषयसँग सम्बन्धित व्यवसायी र अनुसन्धानकर्ता, विज्ञ, विकास साझेदार, गैरसरकारी क्षेत्र तथा युवा गरी ५सय भन्दाबढीको सहभागिता रहने अपेक्षा गरिएको बताए । यसैगरी, स्थानीय तहका जनप्रतिनिधि, रोजगार सेवा केन्द्रका कर्मचारी तथा अन्य सरोकारवालालाई भर्चुअल माध्यमबाट सहभागी गराइँने मन्त्रालयले जनाएको छ ।
नेपालको श्रम तथा रोजगारीको क्षेत्रमा संकुचन आएको सन्दर्भमा आयोजित सम्मेलनले रोजगारी सिर्जना गर्न योगदान पुग्ने मन्त्रालयको विश्वास छ । यसअघि मन्त्रालयले २०५४ सालमा पहिलोपटक श्रम तथा रोजगार सम्मेलन आयोजना गरेको थियो ।