३१ जेठ/अर्थ र व्यापार – श्रम, रोजगार तथा सामाजिक सुरक्षा मन्त्रालयले पूर्वदेखि पश्चिमसम्मका सातवटै प्रदेश समेटेर आयोजना गरेको श्रमाधान रोजगार मेला बाग्मती प्रदेशको ललितपुरको पाटन संयुक्त क्याम्पसमा आएर सम्पन्न भएको छ ।
बाग्मती प्रदेशमा आयोजना गरेको दुईदिने श्रमाधान रोजगार मेलामा १३ हजार ९ सय ७८ जनाले रोजगारीका लागि आवेदन दिएको मन्त्रालयले जनाएको छ । यस मेलामा रोजगारताबाट १ हजार ५ सय ५ श्रमिकको माग गरिएको थियो । मंगलबार र बुधबार चलेको मेलामा करिब ५ हजारले अवलोकन गरेका थिए ।
सो मेला समापन कार्यक्रममा पाटन बहुमुखी क्याम्पसका प्रमुख डा. लक्ष्मणसिंह कुँवरले नेपाली युवामा अझै पनि श्रमको महत्व नबुझेको बताए ।
विदेशमा गएर जुनसुकै श्रम गर्न रुचाउने नेपाली श्रमिकले नेपालमा भने त्यही रोजगारीमा गर्न नचाहेको कारण पनि बेरोजगारी बढेको उनले बताए । तर, मन्त्रालयले गरेको यस्तो मेलाले रोजगारीको महत्व बुझाउने बताए ।
यसैगरी, उनले मेलाले रोजगारदाता र श्रमिकको गुनासोलाई सम्बोधन गर्न सक्ने बताए । ‘यता रोजगारदाता श्रमिक पाइएन भन्छन् उता श्रमिक रोजगारी पाइएन भन्छन् । यस्ता मेला दुवै पक्षलाई एकै स्थानमा भेला गराउँदा समस्या सम्बोधन हुनेछ,’ उनले भने ।
नेपाल घरेलु तथा साना उद्योग महासंघका केन्द्रीय वरिष्ठ उपाध्यक्ष सूर्यबहादुर कँडेलले रोजगार मेलाले नेपालमा नै रोजगारीको अवसर हुने सकारात्मक सन्देश दिएको बताए । उनले यस्तो मेला जिल्ला र पालिका तहसम्म लैजानुपर्ने बताए ।
कार्यक्रम समापनको अवसरमा श्रम मन्त्रालयका उपसचिव एवं बाग्मती प्रदेशको रोजगार मेलाका संयोजक डम्बरबहादुर सुनुवारले मेला सञ्चालनमा गर्न सहयोग गर्ने सबैमा आभार व्यक्त गरे ।
गत १७ जेठदेखि कोशि प्रदेशको विराटनगरबाट सुरु भएको श्रमाधान रोजगार मेला बाग्मती प्रदेशको ललितपुरमा बुधबारदेखि सम्पन्न भएको हो । यस्तो मेला प्रत्येक प्रदेशमा दुई÷दुई दिन सञ्चालन भएको थियो ।
तपाईको प्रतिक्रिया