१६ पुस/अर्थ र व्यपार – प्रतिनिधि सभाको राज्य व्यवस्था तथा सुशासन समितिले बालकुमारी घटनामा भौतिक पूर्वाधार तथा यातायातमन्त्री प्रकाश ज्वालालाई पनि छानबिनको दायरामा ल्याउन निर्देशन दिएको छ ।
समितिले सोमबार उपप्रधानमन्त्री तथा गृहमन्त्री नारायणकाजी श्रेष्ठ, प्रहरी महानिरीक्षक वसन्त कुँवर लगायतलाई बोलाएर छलफल गरी मन्त्री ज्वाला र श्रम रोजगार तथा सामाजिक सुरक्षा मन्त्रालयलाई छानबिनको दायरामा ल्याउन यस्तो निर्देशन दिएको हो।
‘घटना घट्न श्रम, रोजगार तथा सामाजिक सुरक्षा मन्त्रालय र भौतिक पूर्वाधार तथा यातायातमन्त्री ज्वालाको भूमिकाबारे समेत छानबिन गर्ने निर्देशन छ,’ समितिका सभापति रामहरि खतिवडाले बैठकको अन्तिममा निर्णय सुनाए।
त्यसअघि, बैठकमा प्रहरी महानिरीक्षक कुँवरले कोरियन भाषा परीक्षाको आवेदन भर्न नपाएको आक्रोशमा युवाहरुले प्रदर्शन गरिरहेका बेला मन्त्री ज्वालाले सातदोबाटोबाट बालकुमारीको बाटो यात्रा गरेका कारण यस्तो घटना घटेको बताएका थिए ।
मन्त्रीको गाडी देखेपछि युवाहरु थप उग्र बनेको उनको भनाइ छ । कोरियन भाषा परीक्षाको आवेदन भर्न नपाएको आक्रोशमा प्रदर्शनमा उत्रिएका युवाले गत १३ पुसमा ललितपुरको बालकुमारीमा मन्त्री ज्वालाको गाडीमा आगजनी गरेका थिए । प्रहरीले गोली चलाउँदा २ युवाको ज्यान गएको थियो।
समितिले मृतकका परिवारलाई थप क्षतिपूर्ति दिन र रोजगारीका अवसर प्रदान गर्न सरकारलाई निर्देशन दिएको छ । सरकारले शनिबार दुवै मृतकका परिवारलाई १०÷१० लाख रुपैयाँ क्षतिपूर्ति दिने निर्णय गरेको थियो।
तपाईको प्रतिक्रिया