६ माघ /अर्थ र व्यापार – प्रधानमन्त्री पुष्पकमल दाहालले अब सरकारले वैदेशिक रोजगारीमा देखिएका विकृति र विसंगति हटाउने बताएका छन ।
शुक्रबार नेपाल वैदेशिक रोजगार व्यवसायी संघको २९ औं साधारण सभाको उद्घाटन गर्दै प्रधानमन्त्रीले तेस्रो कार्यकालमा विदेशमा रहेका नेपालीहरूको हितलाई केन्द्रमा राखेर काम गर्ने बताएका हुन् । उनले व्यवसायी समक्ष आफ्नो तेस्रो कार्यकालमा देशलाई केही दिने गरी काम हुने आश्वासन दिए ।
यसैगरि, प्रधानमन्त्री दाहालले आफु दोस्रोपटक प्रधानमन्त्री हुँदा विदेशमा रहेका नेपालीहरूको हितका पक्षमा केही महत्वपूर्ण काम गरेको स्मरण गर्दै उनले विदेशमा रहेका नेपालीहरूको बिमा, श्रम स्वीकृति, क्षतिपूर्तिको रकममा वृद्धि लगायत महत्वपूर्ण काम भएका थिए । यसपटक विदेशमा रहेका नेपालीको हितलाई केन्द्रमा राखेर थप काम गर्ने भन्दै प्रधानमन्त्री दाहालले भने, ‘ आफ्नो तेस्रो कार्यकाल मुलूकको विकास, समृद्धि र सुशासनका निम्ति चुनौतीपूर्ण अवसर हो ।’
‘देशलाई केही दिनैपर्ने परिस्थितिमा प्रधानमन्त्री भएको छु, देशलाई केही न केही परिणाम दिनुछ र दिन्छु।’ प्रधानमन्त्रीले वैदेशिक रोजगारीमा थुप्रै समस्या रहेको भन्दै त्यसतर्फ विशेष ध्यान दिन व्यवसायीलाई आग्रह गरे ।
अघिल्लो वर्ष वैदेशिक रोजगारीमा थुप्रै समस्या रहेको आफुले जानकारि पाएको भन्दै उनले भने, ‘यो व्यवसाय संवेदनशील छ’। जसलाई व्यवस्थित र मर्यादित बनाउनैपर्छ, यसभित्र थुप्रै विकृति र विसंगति छन्, त्यसको अन्त्य गर्नुपर्छ, मेरो विश्वास छ, सरकारको प्रयासमा तपाईंहरूको साथ हुनेछ ’ उनले भने ।