२५ जेठ/अर्थ र व्यापार – वैदेशिक रोजगारीबाट फर्किएका कामदारको जीवनस्तर विकास गर्न स्वीजरल्याण्ड सरकारले ८६ करोड रुपैयाँ सहयोग गर्ने भएको छ ।
स्वीस सरकारले विभिन्न देशबाट वैदेशिक रोजगारी गरी नेपाल फर्किएका नेपाली कामदारहरुको जीवनस्तर वृद्धिकालागि सो रकम खर्च गर्न लागेको हो । स्वीस सरकारले ‘रिइन्टीग्रेसन अफ रिर्टनी माइग्रेन्ट वर्कर’ परियोजना मार्फत सो रकम नेपाललाई सहयोग गरेको हो ।
नेपाल फर्किएका श्रमिकहरुको आर्थिक, सामाजिक, सांस्कृतिक एवं राजनीतिक जीवन सुधार र विदेशमा आर्जन गरेको ज्ञान, सीप नेपालमै उपयोग गर्न आवश्यक पर्ने सबै प्रबन्ध मिलाउनको लागि स्वीजरल्यान्डले यस्तो सहयोग गरेको हो ।
यस परियोजना अन्तर्गत प्राप्त हुने सहयोग रकम प्रदेश १ र मधेस प्रदेशका २० वटा स्थानीय तहमा उपयोग गरिनेछ । यो सहयोग परिचालन आगामी जुलाई महिनाबाट कार्यान्वयन गरिने छ । परियोजनाबाट प्राप्त सहयोग रकमलाई नेपालको रातो किताबमा समावेश गरिएको छ ।
यो परियोजना नेपालको तर्फबाट अर्थ मन्त्रालयका सह–सचिव इश्वरीप्रसाद अर्याल र स्वीजरल्यान्डको तर्फबाट नेपालस्थित स्वीस राजदुतावासकी सिल्भाना होगले बुधबार हस्ताक्षर गरेका हुन् ।
नेपालस्थित स्वीस राजदुतावासकी होगले यस सम्झौताले वैदेशिक रोजगारबाट नेपाल फर्किएका नागरिकहरुलाई आफूले आर्जन गरेको सीपको सदुपयोग गर्न सघाउने र नेपालमा उद्यमशीलता विकासका लागि आवश्यक पर्ने पुँजी जुटाउन सहयोग गर्ने बताइन् । यसैगरी, सह सचिव अर्यालले यस किसिमका परियोजनाले स्वदेश फर्किएका श्रमिकहरुको पुर्नस्थापनामा सहयोग पुर्याउने बताए ।
तपाईको प्रतिक्रिया