११ चैत/अर्थ र व्यापार – गत फागुन महिनामा रोजगारीका लागि विदेशिने नेपाली कामदारको संख्या थप घटेको छ । माघमा भन्दा फागुन महिनामा विदेश जाने श्रम स्वीकृति लिने नेपाली कामदारको संख्या १ हजार जनाले घटेको वैदेशिक रोजगार विभागले जनाएको छ ।
विभागका अनुसार वैदेशिक रोजगारीमा जाने नेपाली कामदारको संख्या गत जेठ यता लगातार उकालो लागिरहेकामा पछिल्लो तीनमहिना यात गत पुसबाट क्रमशः घट्न थालेको थियो ।
वैदेशिक रोजगार विभागका अनुसार फागुन महिनामा जम्मा ५३ हजार ४५७ जनाले वैदेशिक रोजगारीमा जाने श्रम स्वीकृति पाएका छन् । माघ महिनामा यस्तो संख्या ५४ हजार ४७० जना थियो । फागुनमा दैनिक औसत १ सय ७८१ जना श्रमिक विदेश गएका छन् ।
गत फागुन महिनामा बाहिरिएका साढे ५५ हजार मध्ये २७ हजार ५२० जनाले नयाँ श्रम स्वीकति लिएका थिए भने अन्यले श्रम स्वीकृति नवीकरण गरेका थिए ।
गत पुस महिनामा दैनिक औसत वैदेशिक रोजगारीमा जानेको संख्या करिब २ हजार र मंसिरमा २ हजार ५ सय थियो । पुस महिनामा ६६ हजार ६२५ जना श्रमिकले वैदेशिक रोजगारीमा जान श्रम स्वीकृति लिएका थिए भने मंसिर महिनामा ७४ हजार ३५४ जना नेपाली कामदार वैदेशिक रोजगारीका लागि विदेश पुगेका थिए ।
नेपालमा महामारीको तेस्रो लहरले माघ महिनामा यसरी विदेशिने कामदारको संख्या घटेको अनुमान छ । वैदेशिक रोजगार विभागका अनुसार कोरोना महामारीका कारण दुई वर्षयता वैदेशिक रोजगारीमा आएको संकट हट्दै गएपछि विदेशिने नेपालीको संख्या बढ्दै गएको थियो । तर, पुस महिनापछि संख्या बढ्ने क्रम रोकिएको छ ।
अहिले पनि खाडी मुलुक कतार, साउदी अरेबिया र यूएईमा जाने नेपालीको संख्या धेरै छ । कुवेत, ओमान लगायतका देशमा पनि नेपालीहरु गइरहेका छन् । चैत महिनादेखि मलेसियाबाट पनि माग आउन थालेकाले अब भने वैदेशिक रोजगारीमा जाने नेपालीको संख्या विस्तारै बढ्ने अनुमान गरिएको विभागले जनाएको छ ।
विभागका अनुसार २०७८ वैशाखमा २४ हजार ३६३ जना नेपाली रोजगारीका लागि विदेश गएका थिए । तर, जेठमा विदेशिने नेपालीको संख्या घटेर ४ हजार ८६ मा सीमित भएको थियो । असारमा २० हजार ६५८ जना नेपालीले विदेश जान श्रम स्वीकृति लिए ।
विभागका अनुसार साउनमा २५ हजार ४२८ जना, भदौमा ३६ हजार ४० जना, असोजमा ३९ हजार ६७१ जना र कात्तिक महिनामा ५४ हजार ९१८ जना नेपाली कामका लागि विदेश उडेका थिए ।
तपाईको प्रतिक्रिया