१२ मंसिर /अर्थ र व्यापार – श्रम, रोजगार तथा सामाजिक सुरक्षामन्त्री कृष्णकुमार (किसान) श्रेष्ठले सामाजिक सुरक्षा कोषमा बैंक तथा वित्तीय संस्थामा कार्यरत कर्मचारीलाई सहजै आबद्ध हुने वातावरण सिर्जना गर्ने बताएका छन् ।
सामाजिक सुरक्षा कोषको चौथो सामाजिक सुरक्षा दिवसको अवरमा आयोजित कार्यक्रममा मन्त्री श्रेष्ठले यस्तो बताएका हुन् । उनले नयाँ कामको सुरुवात भएकाले केही कमी कमजोरी देखिएको भए पनि अब बिस्तारै यसको कार्यविधि संशोधन गरेर उल्लेख्य रोजगारदाता र श्रमिक आबद्ध गराउने रणनीति सरकारको भएको बताए ।
यही सामाजिक सुरक्षा कोषमार्फत नै श्रमिकको हकअधिकार सुनिश्चित हुने दाबी गर्दै उनले अनौपचारिक क्षेत्रका श्रमिकलाई पनि बिस्तारै समेटिने बताए ।
उनले अब सातै प्रदेशमा कोषका शाखा विस्तार गर्ने योजना सरकारको रहेको बताउँदै सरकारको यस्तो राम्रो कदममा साथ दिन सम्बन्धित सबैलाई आग्रह गर्दै जति सक्दो छिटो आबद्ध हुन पनि आह्वान गरे  । 
कार्यक्रममा रोजगारदाताका तर्फबाट उपस्थित भएका उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले सामाजिक सुरक्षा कोषका कार्यक्रमहरूलाई समयानुकूल परिष्कृत गर्दै जानुपर्ने बताए । उनले यस कोष हरेक तवरबाट परिपूर्ण नभएको बताउँदै अझै यसलाई कसरी हुन्छ प्रभावकारी बनाउनुपर्ने धारणा राखे । 
यसैगरि, ढकालले योगदानमा आधारित सामाजिक सुरक्षा प्रणालीमा देखिएका समस्या र चुनौतीहरूको समाधान गर्दै अघि बढ्नुपर्ने बताए । योगदानमा आधारित सामाजिक सुरक्षा प्रणाली सुरु भएको चार वर्ष पूरा भएको उपलक्ष्यमा आयोजित कार्यक्रममा उनले सामाजिक सुरक्षाको प्रत्याभूति गरी श्रम क्षेत्रका समस्या समाधान गर्दै असल श्रम सम्बन्ध विकास गर्ने हामी सबैको साझा लक्ष्य रहेको बताए ।
वरिष्ठ उपाध्यक्ष ढकालले सामाजिक सुरक्षा प्रणाली हाम्रा लागि नयाँ भएकाले यसको कार्यान्वयनमा केही व्यावहारिक कठिनाइहरू देखिएको भन्दै हालसम्म प्राप्त गरेको अनुभव र सुरक्षा प्रणालीको कार्यान्वयनमा देखिएका चुनौतीहरूलाई मनन गरी योगदानमा आधारित सामाजिक सुरक्षा प्रणालीलाई सफलपूर्वक अघि बढाउन कोष सक्षम हुने अपेक्षा गरिएको बताए । उनले हालसम्म करिब १६ हजार प्रतिष्ठान र २ लाख ९५ हजार श्रमिकको सूचीकरण भइसकेको जानकारी पनि दिए । सूचीकृत श्रमिकहरूले सामाजिक सुरक्षा कोषबाट सुविधा पनि पाउन थालिसकेका जानकारी दिँदै वरिष्ठ उपाध्यक्ष ढकालले यस प्रणालीबारे अझै पनि धेरै भ्रम र बुझाइको कमी रहेकाले त्यो भ्रम हटाउनुपर्ने बताए ।
सो कार्यक्रममा सामाजिक सुरक्षा कोषका कार्यकारी निर्देशक कपिलमणि ज्ञवालीले सामाजिक सुरक्षा कोषमा हालसम्म १५ हजार ८ सय बढी रोजगारदाता र २ लाख ९५ हजार बढी श्रमिक आबद्ध भएको बताए । यीमध्ये १ सय २३ आश्रित परिवारले निरन्तर पेन्सनको सुविधा पाउने उनले जानकारी दिए । यसैगरी, उनले बिस्तारै रोजगारदातार श्रमिकहरूबीच यस कोषमा आबद्ध हुने आकर्षण बढ्दै गइरहेको बताए । 
त्यसैगरी, सामाजिक सुरक्षा कोषले चौथो सामाजिक सुरक्षा दिवसका अवसरमा कोषमा आबद्ध भएका श्रमिकको विभिन्न कारणले मृत्यु भएका योगदानकर्ताका ५२ आश्रित परिवारलाई आजिवन पेन्सन वितरण गरेको पनि ज्ञवालीले  जानकारी दिए ।