१९ वैशाख/अर्थ र व्यापार – लगानी बोर्डले आगामी ४ वर्षभित्र ८ अर्ब ९५ करोड अमेरिकी डलर बराबरको ११ वटा परियोजना निर्माण सम्पन्न गर्ने लक्ष्यसहित आफ्नो रणनीति तथा व्यावसायिक योजना बनाएको जनाएको छ ।
अहिलेको अवस्थालाई समेत ध्यानमा राखेर आगामी आर्थिक वर्ष २०८५/८६ सम्म कम्तीमा ४ अर्ब ७ करोड डलरका ५ वटा परियोजना सञ्चालनमा ल्याइसक्ने लक्ष्यसहित बोर्डले यस्तो रणनीति तथा योजना बनाएको हो । बोर्डले आर्थिक वर्ष २०८५/८६ सम्म कम्तीमा २ अर्ब ८३ करोड डलर बराबरका ७ वटा परियोजना निर्माणको चरणमा पुगिसक्ने तथा अधिकतम ५ अर्ब ५५ करोड डलरका १४ वटा निर्माणको अन्तिम चरणमा पु¥याउने योजना बनाएको छ ।
बोर्डले आगामी ४ वर्षमा २४ अर्ब ३० करोड डलर बराबरका ५७ वटा परियोजना ‘पाइपलाइन’मा राखी सम्भाव्यता अध्ययन गर्न प्रस्ताव गरेको छ । २३ अर्ब ५० करोड डलरका ५२ वटा परियोजना खरिदको चरणमा पु¥याउने तथा १७ अर्ब ९५ करोड डलर बराबरका ४२ वटा आयोजना परियोजना विकास सम्झौता (पीडीए) र परियोजना कार्यान्वयन सम्झौता (पीआइए) वार्ताको चरणमा हुने बोर्डका अधिकारीहरूले बताएका छन्।

बोर्डका प्रवक्ता प्रद्युम्नप्रसाद उपाध्यायले १५ अर्ब ७० करोड डलर लागतका ३२ वटा परियोजना वित्तीय व्यवस्थापन र पूर्व–विकास गतिविधि सञ्चालनको अवस्थासम्म लग्ने गरी व्यावसायिक रणनीति स्वीकृत गरेको जानकारी दिए ।
४ वर्षभित्र निजी लगानीका ६७ वटा परियोजनाका लागि ७ अर्ब ४५ करोड डलर र अन्य निकायबाट कार्यान्वयन हुने २५ वटा परियोजनाका लागि ३ अर्ब १५ करोड डलर बराबरको लगानी स्वीकृत गर्ने बोर्डको योजना छ ।
पूर्वाधार विकासका क्षेत्रमा सार्वजनिक–निजी साझेदारी (पीपीपी) अवधारणामा महत्वाकांक्षी लक्ष्य हासिल गर्ने गरी बोर्डको आइतबार बसेको बैठकले रणनीति तथा व्यावसायिक योजना स्वीकृत गरेको जनाएको छ ।
अब यस योजना कार्यान्वयनका लागि बोर्डको सांगठनिक संरचना पनि फेरिएको छ । बोर्डमा अब योजना प्रशासन तथा वित्तीय व्यवस्थापन निर्देशनालय, सार्वजनिक–निजी साझेदारी निर्देशनालय, लगानी प्रवर्धन तथा सहजीकरण निर्देशनालय र आयोजना विकास तथा व्यवस्थापन निर्देशनालय राखिएको छ ।
बोर्ड निर्देशनालयको नेतृत्व कम्तीमा सहसचिव स्तरको कर्मचारीले गर्नेछन्। बोर्डले आफ्नो स्थापनायता विभिन्न ३८ वटा परियोजनाका लागि १२ खर्ब रुपैयाँ बराबरको लगानी स्वीकृत गरेको छ ।