१ फागुन/अर्थ र व्यापार – प्रधानमन्त्री पुष्पकमल दाहाल ‘प्रचण्ड’ले बिग्रन लागेको देसको अर्थतन्त्रलाई सुधारको बाटोमा ल्याउन लागिएको बताएका छन्।
राजधानीमा आयोजित एक कार्यक्रममा प्रधानमन्त्री दाहालले यस्तो बताएका हुन । उनले आन्तरिक कारण साथै वाह्य कारणले गर्दा मुलुकको अर्थतन्त्र विगत केही समयदेखि अप्ठेरो स्थितिबाट गुज्रिरहेको अवस्थाकाबीच पनि अहिले सरकारले बिग्रिन गालेको अर्थथन्त्रलाई सुधारको बोटोतर्फ ल्याईरहेको बताए ।
‘सरकारले विभिन्न निकाय मार्फत अर्थतन्त्रका चुनौतीहरुको सामना गर्न र अर्थतन्त्रलाई थप अप्ठेरो दिशातर्फ जानबाट रोक्ने प्रयास जारी राखेको भन्दै उनले मुलुकले विगतमा अपनाएको राजनीतिक व्यवस्था र त्यस अन्तर्गतको शासकीय प्रणाली र कुशासनले मुलुकको आर्थिक अवस्था कमजोर भएको बताए ।
अब देसमा शुसासनको राजनीतिक प्रणाली अवलम्बन नगरी अर्थतन्त्रको सुदृढिकरण र जनताले चाहेको विकास तथा समृद्धि हासिल हुन सक्दैन भन्ने प्रष्ट रहेको बताउँदै प्रधानमन्त्री दाहालले भने, ‘अब भने एकाग्र भएर हामी विकास र समृद्धिको कार्यभारतर्फ लाग्न सक्छौँ । ’
उनले सरकारले अहिले तत्कालको आर्थिक समस्या समाधान गर्ने र आगामी दिनमा उच्च आर्थिक वृद्धिको आधार तयार गर्ने क्रममा प्रमुख ध्यान उत्पादन र रोजगारी वृद्धिमा केन्द्रित रहेको बताए ।
अर्थतन्त्र सुधारको विषयलाई आफूले जीवन र मरणकै सवाल ठानेको बताउँदै प्रधानमन्त्री दाहालले भने, ‘ बिग्रिन लागेको अर्थतन्त्रलाई सुधारको बाटोमा लैजानु मेरो सफलता वा असफलता होइन, सरकारको मात्रै सफलता वा असफलता पनि होइन । सिंगै नेपाली समाज र नेपाल राष्ट्रको सफलता र असफलताको बिन्दु यसमै जोडिएको छ ।’
अर्थतन्त्रको चुनौतीका बीचमा आफूलाई नेतृत्व गर्ने अवसर रहेको भन्दै उनले दुई महिनायता अर्थतन्त्रमा केही सुधारको संकेत देखिएको दावी गरे ।
उनले मन्त्रिपरिषदको पहिलो बैठकमै आफुले अर्थतन्त्र सुधारका सम्बन्धमा निर्णय गरिएको स्मरण गरे । अर्थतन्त्र सुधारका लागि पनि कर्मचारीतन्त्रमा अनावश्यक संरचना खारेज गर्ने र आवश्यक संरचना खडा गर्नु अहिलेको आवश्यकता रहेको भन्दै उनले आफ्नो पहिलो प्राथमिकता कृषिको आधुनिकीकरण गर्न कृषि सुधारका लागि चाहिने प्रविधि, ज्ञान र सिपको विकास नै रहेको बताए ।
उपप्रधान तथा अर्थमन्त्री विष्णुप्रसाद पौडेलले बिग्रिदैगरेको देसको अर्थतन्त्रको समस्या समाधान गर्न आफुले यो जिम्मेवारी सम्हालेदेखि निरन्तर प्रयास गर्दै आएको बताए । उनले निजी क्षेत्रको व्यावसायिक आत्मविश्वास जोगाउन, सरकार र निजी क्षेत्रबीचको सम्बन्धलाई विश्वसनीय र सहयोगी बनाउन, राजस्व परिचालनमा देखिएको विकृति र विचलनलाई सुधार ल्याउन बजेट कार्यान्वयनमा विद्यमान समस्यमा समाधान गर्न र वित्तीय क्षेत्रमा देखापरेका समग्र समस्या समाधानकालागि आफुले सक्दो प्रयास गरेको बताए ।
नेपाल राष्ट्र बैंकका गभर्नर महाप्रसाद अधिकारीले नेपाल राष्ट्र बैंक पुँजीबजारप्रति आफु नकारात्मक नरहेको बताए । उनले नेपाल राष्ट्र बैंक पुँजीबजारको विकास गर्न प्रतिबद्ध रहेको भन्दै आफु कहिल्यै पुँजीबजारप्रति नकारात्मक नभएको बताए ।
गभर्नर अधिकारीले शेयर बजार बढ्नु र कहिलेकाहीँ घट्नु स्वभाविक भएको भन्दै धितोपत्र बोर्डले पुँजी बजारलाई नियन्त्रण र अनुगमन गर्ने बताए । तर राष्ट्र बैंकले नियमन गर्ने भनेको वित्तीय क्षेत्रभित्रका बैंक तथा वित्तीय संस्थाहरु मात्रै भएको उनले जानकारि दिए । उनले नेपाली पुँजी बजारमा बाफियाभित्र ७० प्रतिशत संस्थाहरु समावेश भएकाले राष्ट्र बैंकले यी संस्थाहरुलाई गरेको नियमनको कारणले प्रभाव परेको हुनसक्ने धारणा राखे।