३ कात्तिक/अर्थ र व्यापार – आगामी आइतबारको दिन काग तिहारबाट सुरु हुने यमपंचककालागि काठमाडौंको बबरमहलस्थित नेपाल राष्ट्र बैंकको टक्सार विभागमा अहिले सर्वसाधारणको बाक्लो भीड लागेको छ ।
तिहारमा धनतेरस पुज्नका लागि सुन र चाँदीका सिक्का किन्नेहरु अहिलेदेखि नै राष्ट्र बैंकमा लाइनमा बसेका हुन् । सुन्धारास्थित राष्ट्र बैंकको टक्सार विभाग धरहरा पुनर्निर्माण हुने भएपछि भत्किएको थियो । जसले गर्दा साढे २ वर्षसम्म पानीमा भिजेको मेसिनले गत चैतबाट असर्फी उत्पादन सुरु गरेर बेच्न लागिएको राष्ट्र बैंक टक्सार विभाग प्रमुख विनोद आचार्यले जानकारी दिए ।
गत वर्षको तिहारमा नै बबरमहलस्थित भाडामा लिएको घरमा मेसिन जडान गरेर परीक्षणका लागि असर्फी उत्पादन गरेको भएपनि गत चैतबाट मात्रै व्यावसायिक उत्पादन सुरु गरेको उनले बताए ।
राष्ट्र बैंकले सधैं यस्तो असर्फी बिक्री गरिरहेकै हुन्छ । तर, तिहार नजिकिएपछि यस्तो असर्फीको बिक्री ह्वात्तै बढ्ने भए पनि त्यसलाई सहजीकरण गर्ने गरेको छ । सुन र चाँदीको सिक्का’ नै असर्फी हो । यो मुद्रा भए पनि चलनचल्तीमा आउने मुद्रा हैन ।
सुनलाई सिक्काको आकार दिएर बनाउने काम राष्ट्र बैंकले गर्छ । ‘असर्फी’ किन्नेहरु प्रायः उच्च र मध्यम वर्गीय परिवारका हुन्छन् । काठमाडौंमा मात्रै असर्फी बेचिने भएकाले
उपत्यकाबाहिरका सर्वसाधारणले यस्तो सुविधा पाउँदैनन् । नेपाल राष्ट्र बैंकले ३ कात्तिक बिहीबारदेखि तिहार (धनतेरस) का लागि सुन र चाँदीको असर्फी बिक्री सुरु गरेको छ ।
राष्ट्र बैंकको टक्सार विभागबाट २.५ ग्राम, ५ ग्राम र १० ग्रामका सुन तथा चाँदीको असर्फी बिक्री सुरु भएको हो । यस्तै चाँदीको भने १० ग्रामको मात्रै असर्फी बिक्री भइरहेको आचार्यले बताए ।
१.५ ग्रामका असर्फी भने यस वर्ष उपलब्ध नरहेको राष्ट्र बैंकले जनाएको छ । विभागले १.५ ग्रामको असर्फी उत्पादनको लागि प्रस्तव पठाएको भएपनि राष्ट्र बैंक्को व्यवस्थापनबाट कुनै जवाफ नआएपछि यस वर्ष २.५ ग्राम, ५ ग्राम र १० ग्रामका मात्रै सुनका असर्फी उपलब्ध रहेको उनले बताए ।
उनले सुनको असर्फीको मूल्य सुनको मूल्यमा भएको घटबढ अनुसार दैनिक रुपमा तलमाथि हुने बताए । बिहीबार सर्वसाधारणले १० ग्रामको सुनको असर्फी ८२ हजार ९०२ रुपैयाँ ५ ग्रामका असर्फीको मूल्य ४१ हजार ४५१ रुपैयाँ र २.५ ग्रामको सुनको असर्फीको मूल्य २० हजार ७२६ रुपैयाँ पर्ने राष्ट्र बैंकले जनाएको छ । १० ग्रामको चाँदीको असर्फीको मूल्य भने १ हजार ६०० रुपैयाँ रहेको छ ।