२ पुस/अर्थ र व्यापार – निजी क्षेत्रको संघिय प्रतिनीधिमुलक छाता संस्था नेपाल उद्योग वाणिज्य महासंघको नयाँ विधानको प्रस्तावित सुझावलाई लिएर अहिले महासंघमा आवद्ध व्यवसायीबीच भूकम्प नै गएको छ ।
महासंघको विधान संशोधन समितिले बरिष्ठ उपाध्यक्ष र कोषाध्यक्ष पद हटाउन सुझाव दिएपछि अहिले महासंघमा भुकम्प नै गएझै अवस्था आइलागेको छ । महासंघका पूर्वअध्यक्ष कुशकुमार जोशी संयोजकत्वको समितिले यस्तो प्रस्ताव सहितको सुझाव दिएको थियो ।
महासंघको नयाँ विधानका लागि सुझाव दिन गठन गरिएको सो समितिले दिएको सुझावप्रति अहिले महासंघका तीनजना वर्तमान उपाध्यक्षहरु र अन्य पदाधिकारीहरु नै असन्तुष्ट देखिएका छन् भने अन्य व्यवसायी पनि बेखुसी भएका छन् । 
नयाँ विधान तयार पार्नकालागि महासंघले गठन गरेको पूर्व अध्यक्ष जोशी संयोजकत्वको समितिले बरिष्ठ उपाध्यक्ष पद हटाउने, वरिष्ठ उपाध्यक्ष अर्काे कार्यकालको लागि स्वतः अध्यक्ष हुने जस्ता विषय हटाएर अब प्रत्यक्ष निर्वाचित अध्यक्ष बनाउन सुझाव दिएको थियो । यसैगरि, सो समितिले कोषाध्यक्ष पद पनि हटाएर उपाध्यक्षले नै कोषाध्यक्षको जिम्मेवारी लिनेगरि नयाँ व्यवस्था गर्ने सुझाव दिइएको थियो ।
विधान मस्यौदा सुझाव समितिले बरिष्ठ उपाध्यक्ष पद हटाउन गरेको सुझावलाई महासंघका अहिलेका तीनजना उपाध्यक्षहरुले असन्तुष्टी जनाएका हुन् । महासंघका उपाध्यक्षहरु दिनेश श्रेष्ठ (उद्योग), अन्जनकुमार श्रेष्ठ (वस्तुगत) र रामचन्द्र संघाई (एसोसिएट) व्यवसायीहरु यस्तो प्रस्तावबाट असन्तुष्ट देखिएका हुन् । 
महासंघका वर्तमान उपाध्यक्षहरु नै नयाँ व्यवस्थाप्रति असन्तुष्ट रहेको विधान समस्यौदा सुझाव समितिका एक सदस्यले जानकारि दिए । ‘अहिलेका उपाध्यक्षहरुलाई अर्काे पटक आफु वरिष्ठ उपाध्यक्ष भईहाल्छु भन्ने रहेछ, बरिष्ठ उपाध्यक्ष पदमा अहिलेका उपाध्यक्षहरु दिनेश श्रेष्ठ, अन्जनकुमार श्रेष्ठ र रामचन्द्र संघाईबीच मात्रै प्रतिस्पर्धा हुने हो र आफुहरुले अन्य दुई जनालाई सजिलै जितिहालिन्छ  नि भन्ने मनोविज्ञान तीनै जनामा रहेछ, त्यसैले बरिष्ठ उपाध्यक्ष पद हटाएर प्रत्यक्ष निर्वाचित अध्यक्ष बनाउने समितिको सुझावमा उहाँहरु तीनैजना उपाध्यक्षहरु को असन्तुष्टी देखियो हो ’ विद्यान संसोधन समिति मस्यौदा सुझाव समितिका एक सदस्यले भने ।
महासंघको नयाँ विधानको लागि समितिले पेश गरेको यस्तो सुझावप्रति महासंघकै कार्यसमिति सदस्यहरु र अन्य सदस्यहरुले पनि असन्तुष्टी जनाएका छन् । मस्यौदा निर्माणका क्रममा आफूहरुसँग कुनै परामर्श र छलफल नभएको भन्दै महासंघको कार्यसमितिका केही सदस्य र जिल्ला तथा नगरका सदस्यहरुले पनि असन्तुष्टी जनाएका छन् । यस्तै, एसोसिएट र वस्तुगत संघका केही सदस्यको पनि असन्तुष्टी देखिएको छ । तर, समितिका संयोजक जोशीले भने सरोकारवालाहरुसँग व्यापक छलफल र परामर्शपछि आफुहरुले यस्तो सुझाव तयार पारिएको दाबी गरेका छन । 
‘महासंघको नेतृत्वको पनि विधान संशोधन गर्नुपर्ने पहिलो प्राथमिकता राखेको थियो, त्यही अनुसार समितिले महासंघलाई बलियो र दरिलो रुपमा अगाडि बढ्नको लागि सहयोग पुग्नेछ, अहिले बनेको बिधानले अब प्रत्यक्ष निर्वाचनबाट नै अध्यक्ष छान्ने प्रावाधान गरिएको छ तर, यो विधानले अहिलेका बरिष्ठ उपाध्यक्ष स्वत अध्यक्षमा निर्वाचित गरेकाले वर्तमान वरिष्ठ उपाध्यक्ष चन्द्रप्रसाद ढकाललाई महासंघको स्वतः अध्यक्ष बन्न भने रोक्ने छैन । ढकालपछि महासंघको अध्यक्ष हुने व्यक्ति भने प्रत्येक्ष निर्वाचन लड्नु पर्छ’ संयोजक जोशीले विधान मस्यौदा महासंघ नेतृत्वलाई बुझाउँदै भनेका थिए ।
महासंघले नै गठन गरेको समितिले दिएको यस्तो सुझावप्रति महासंघका उपाध्यक्षहरु र कार्यसमिति सदस्यहरु नै असन्तुष्ट बनेपछि अहिले अध्यक्ष शेखर गोल्छा समेत चेपुवामा परेका छन् । उनले महासंघको साधारणसभा नै विधान संशोधन मस्यौदा पेश गर्ने घोषणा गरिसकेका छन् भने कार्यसमितिले निर्णय नगरी त्यस्तो प्रस्ताव साधारणसभामा पेश हुन सक्दैन । ‘उहाँ (अध्यक्ष गोल्छा) ले यसअघिको साधारणसभा नै विधान संशोधनकोलागि मस्यौदा पेशगर्ने घोषणा गरिसक्नु भएको छ, तीनैजना वर्तमान उपाध्यक्षहरु र कार्यसमितिका केही सदस्य पनि नयाँ मस्यौदाप्रति असन्तुष्ट देखिएपछि कार्यसमितिले निर्णय गरेर आगामी साधारणसभामा पेश गर्न समस्या देखिएको छ, यो विषयलाई महासंघ अध्यक्ष गोल्छाले कसरी अघि बढाउछन भन्ने विषय अहिलेको लागि सबैको चासो विषय बन्यो’ महासंघका एक पदाधिकारीले भने । समितिले दिएको यस्तो सुझावपछि अहिले महासंघका व्यवसायीबीच भूकम्पको अवस्था उत्पन्न भएको उनको भनाई छ ।