३० कात्तिक / अर्थ र व्यापार – नेपाल हस्तकला महासंघले आगामी ३ मंसिर देखि ५ मंसिरसम्म हुने १८औं हस्तकला व्यापार मेला तथा १६औं कला प्रतियोगिताको तयारी पुरा भएको जनाएको छ । 
सोमबार पत्रकार सम्मेलन गरि नेपाल हस्तकला महासंघको आयोजनामा काठमाडौको वौद्धस्थित ह्यात रिजेन्सी होटलमा हुने सो मेलाको सबै तयारी पूरा भएको जानकारी गराईएको हो । 
यस मेलामा विभिन्न हस्तकला सम्बन्धी १२० वटा भन्दा बढी स्टल रहने छ । विगतका मेलाहरुमा हस्तकला बाहेकका पनि स्टल रहने गरेकोमा यसपटकको मेलामा भने विशुद्ध हस्तकलाका सामाग्री मात्र स्टलमा राखिने मेला संयोजक तथा महासंघका उपाध्यक्ष रवीन्द्र शाक्यले जानकारी दिए । मेला संयोजक शाक्यका अनुसार यस मेलामा सहभागी हुनकालागि अहिले अधिकांस स्टल बुकिङ भइसकेको बताए । 
मेलाको म्ख्य आकर्षणहरुमा एउटै छानामुनि हस्तकला वस्तुको बृहत प्रदर्शनी तथा बिक्री, समयसापेक्ष मेड इन नेपाल, मेक इन नेपाल अवधारणा अनुरुप वस्तुको प्रदर्शनी, परम्परागत तथा नवोदित सम–सामयिक हस्तकला विधाको कलाप्रतियोगिता अन्तर्गत परम्परागत–जडाऊ कला( फिलगिरी), समसामयिक प्राकृतिक रेशा(नेचुरल फाइवर), अर्मूत सांस्कृतिक सम्पदाको उजागर, तारागाउँ कल्चर सेन्टरको हलमा उत्कृष्ट हस्तकला वस्तुको कला प्रदर्शनी हुने छ । यसैगरि, विभिन्न विधामा जीवन पर्यन्त संलग्न ७० वर्ष नाघेका जेष्ठ कलाकारलाई सम्मान र हस्तकलाकका क्षेत्रमा उत्कृष्ट निर्यातकर्ताहरुलाई सम्मान रहेको मेला संयोजक  शाक्यले जानकारी दिए । 
शाक्यका अनुसार यस मेलाको उद्घाटन प्रधानमन्त्री शेरबहादुर देउवाबाट हुनेछ भने मेला अवलोकनका लागि विभिन्न मुलुकका कुटनीतिक नियोगका प्रमुख, राजदूत तथा उच्च पदस्थ अधिकारीहरुलाई पनि आमन्त्रण गरिएको छ ।
मेला मार्फत हस्तकला क्षेत्रका उद्यमी व्यवसायीले स्वदेशी तथा विदेशी व्यापारीसँग सम्बन्ध स्थापित गरी व्यापार व्यवसायलाई प्रवद्र्धन गर्न अवसर प्राप्त हुने, प्रत्येक वर्ष एक निश्चित समयमा यस्ता मेला आयोजनाले नयाँ –नयाँ उद्यमी निस्कने, हस्तकलाका वस्तुको उत्पादन, डिजाइन, विकास र वस्तु विविधिकरण प्रोत्साहन मिल्ने, हस्तकलाको क्षेत्रमा रहेकोे सीप, कला र प्रविधिबारे जानकारी आदान प्रदान हुने, स्वदेशमै रोजगारी अभिबृद्धि हुने, हस्तकलामा नयाँ पुस्तालाई आकर्षित गर्न सकिने अपेक्षा गरिएको महासंघले जनाएको छ । 
यसैगरि, महासंघले सोही अवसरमा ई–कला नेपाल अनलाइन पोर्टलको शुभारम्भ तथा ह्यान्डिक्राफ्ट ट्रेड डारेक्टरी २०२१ एवं साधन माला पुस्तक समेत विमोचन गर्ने बताएको छ । ई–कलामा जुनसुकै व्यवसायीले उत्पादन गरेका वस्तुको प्रवद्र्धन गर्नेमा टेवा पुग्ने अपेक्षा गरिएको महासंघले जनाएको छ ।
तीनदिनसम्म चल्ने सो मेलामा झण्डै एकलाख जना अवलोकनकताले सहभागीता जनाउने लक्ष्य राखिएको महासंघका अध्यक्ष सुरेन्द्रभाई शाक्यले जानकारि दिए । मेला अवधीभर प्रत्यक्ष कारोबार र व्यवसायिक अर्डरसमेत गरी करिब तीन देखि पाँचकरोड रुपैयाँसम्मको कारोबार हुने अनुमान गरिएको महासंघले जनाएको छ । यसैगरि, मेला अवलोकन गर्नकालागि एकसय रुपैयाँको प्रवेश टिकट खरिद गरी मेला अवलोकन गर्ने आगन्तुकलाई विशेष आकर्षक डोर उपहारको समेत व्यवस्था गरिएको प्रतियोगिता तर्फका संयोजक राजमान बज्राचार्यले जानकारि दिए । 
उनले नेपालको मौलिक कलाका रुपमा रहेको परम्परागत हस्तकलालाई यहाँका कलाकार कालीगढबाट उत्पादित हस्तकलाका वस्तु स्वदेश र विदेशमा व्यापार व्यवसाय प्रवद्र्धन गर्न हस्तकलामा संलग्न कलाकार, कालीगढलाई प्रोत्साहन गरी सीप हस्तान्तरणमा यस महासंघले विशेष जोड दिँदै आएको बताए । सोही उद्देश्य अनुरुप २०४८ सालदेखि आफनो वार्षिक क्यालेण्डरका रुपमा उद्योग, वाणिज्य तथा आपूर्ति मन्त्रालय, व्यापार निकासी तथा प्रर्वद्धन केन्द्रको सहकार्यमा यस्तो मेला तथा प्रतियोगिता आयोजना गर्दै आएको उनले जानकारि दिए । 
मेलालाई नेपाल उद्योग वाणिज्य महासंघ, नेपाल उद्योग परिसंघ, नेपाल पर्यटन वोर्ड, ललितपुर महानगरपालिका, काठमाडौ. महानगरपालिका, नेपाल सुनचाँदी व्यवसायी महासंघ लगायत संघ÷संस्थहरुको सहयोग रहेको छ । 
मेलाले कोरोना महामारीले सिथिल बनेको हस्तकलाको आन्तरिक तथा बाह्य बजारलाई प्रवद्र्धन गरी देशको अर्थतन्त्रमा टेवा पुग्ने मात्र नभई स्वदेशमै रोजगारीको अवसर दिलाउन तथा राष्ट्रिय तथा अन्र्तराष्ट्रिय क्षेत्रमा क्रेता बिक्रेतालाई एउटै स्थानमा भेला गराउने, नवोेदित उद्यमी व्यवसायीलाई बजार पहँुचको अवसर प्रदान गराउन एवं नेपाली संस्कृतिबीच हस्तकलाको सम्बन्धमा जनभावना उजागर गर्न महत्वपूर्ण भूमिका खेल्ने अपेक्षा गरिएको महासंघले जनाएको छ । 
कार्यक्रममा महासंघका बरिष्ठ उपाध्यक्ष प्रचण्ड शाक्य, हस्तकला प्रतियोगिताका संयोजक तथा उपाध्यक्ष राजमान बज्राचार्य, प्रवक्ता सनम शाक्य, राष्ट्रिय अभिलेखालयका निमित्त महानिर्देशक शौभाग्य प्रधानाङ्ग, व्यापार तथा निकासी प्रवद्र्धन केन्द्रका उपनिर्देशक राजेन्द्र सिंह र नबिल बैंकका प्रतिनिधि निरज बस्नेत, डानियल लगायतले यस मेलाको महत्वको यपलब्धीका  बारेमा आ–आफ्नो धारणा राखेका थिए । 
सो मेलामा करिब ३० हजार भन्दा बढी आगन्तुकहरुलाई मेला अवलोकनको निःशुल्क प्रवेश पास वितरण गरिने महासंघले जनाएको छ । कोभिड–१९ का कारण गत वर्ष मेला आयोजना हुन सकेको थिएन । यो वर्ष पनि कोभिडकै समय भएकाले सामाजिक दूरीलाई मध्यनजर गर्दै हुन लागेको महासंघले जनाएको छ ।