५ पुस/ अर्थ र व्यापार  - ठूलो संख्यामा नियमित रुपमा शेयर कारोबार गर्नेहरुले घटेका बेला किनेको शेयर फेरी महङ्गोमा धमाधम सामान्य लगानीकर्तालाई बिक्री गर्न थालेका छन् । जसका कारण मंगलबारदेखि बजार ओरालो लागेकोमा बिहीबार केही सुधार देखिएको हो ।

बिहीबार बजार ३.२८ अंकले बढेर ११६५.९७ अंकमा उक्लिएको छ । १६३ कम्पनीका १२ लाख ५ हजार ९१४ कित्ता शेयरहरु ४ हजार ८ सय ७८ कारोबारबाट ४० करोड ११ लाख रुपैंयामा किनबेच भएका छन् । कारोबार चक्रमा कारोबारीहरुले प्रत्येक पटक सस्तोमा शेयर किनेर भाउ केही बढ्ना साथ बिक्रीमा ल्याउने गरेका कारण केही दिनको अन्तरमा नै बजारमा असामान्य उतारचढाव देखिने गरेको हो ।

५ रुपैंयाले मात्र भाउ बढेपछि शेयर बेच्न दौडिने जमातको चाल बुझ्न नसक्दा कतिपय लगानीकर्ताहरु हरेक पटक माथिल्लो मूल्यमा शेयर किनिरहेका छन् । उता तिनै कारोबारीहरुले मूल्य केही तल आउना साथ फेरी धमाधम माथिल्लो मूल्यमा शेयर किनेकाहरुबाट सस्तोमा शेयर किनिरहेका छन् । जसका कारण बजार केही बढ्न खोजेजस्तो देखिए पनि बिक्री चाप आईहाल्नाले लगानीकर्ताहरु बजारको गतिप्रति अन्यौलमा परिरहेका छन् । बिहीबार कारोबारमा आएका १० उपसमुह मध्ये ६ उपसमुह उकालो लागेका छन् भने ४ उपसमुह ओरालो लागेका छन् । वाणिज्य बैंक समुहमा आएको ३.२८ अंकको सुधारले नै बजार सुधारमा निर्णयक भूमिका खेलेको छ ।

बिहीबार लगानीकर्ताहरु वाणिज्य बैंकको शेयर कारोबारमा बढी सक्रिय भएका छन् । कारोबार रकमका आधारमा शिर्ष १० स्थानमा वाणिज्य बैंकहरुको मात्र हिस्सा परेको छ । एनएमबि, नेपाल बैंक, नेपाल इन्भेष्टमेण्ट, प्राईम कमर्शियल, एनआईशि एशिया लगायत बैंकहरुको अधिक शेयर कारोबार भएको छ । शेयर मूल्य धेरै बढ्ने शिर्ष १० कम्पनीको सूचीमा एउटा वाणिज्य बैंक बाहेक अधिकांश साना तथा मझौला कम्पनीको वर्चस्व देखिएको छ । धेरै शेयरमूल्य घट्ने कम्पनीहरुको सूचीमा पनि फाइनान्स, लघुवित्त र विकास बैंकहरुको दवदबा रहेको छ ।

वाणिज्य बैंकहरुको व्याजद।रका विषयमा चौतर्फी रुपमा बहस र चर्चा चल्दै गर्दा कतिपय लगानीकर्ता भने पर्ख र हेरको अवस्थामा रहेको देखिएको छ ।