२९ मंसिर / अर्थ र व्यापार - शेयर बजारमा लगानीकर्ताको मनोबल विस्तारै बढ्न थालेको छ । निरन्तर रूपमा कारोबार रकम र सूचकमा वृद्धि हुन थालेपछि उनीहरूको मनोबल क्रमिक रूपमा बढ्न थालेको देखिएको हो । 
मनोबल बढेकै कारण उनीहरूले किन्ने शेयरको परिमाण बढाउन थालेको दुई सातामा गरेको कारोबारको तथ्यांकमा देखिएको छ । गएका साताहरूमा सानो-सानो परिमाणमा शेयर खरिद गर्ने लगानीकर्ताले बिस्तारै ठूलो परिमाणमा कारोबार गर्न थालेको तथ्यांकमा देखिन्छ ।

गएका साताहरूमा एकैपटकमा पाँच सय कित्तादेखि हजार कित्ता, हजारदेखि दुई हजार कित्ता र दुई हजार कित्ताभन्दा माथिको परिमाणमा शेयर खरिद-बिक्री गर्ने क्रम नै अत्यन्तै न्यून हुने गरेको थियो ।

ठूलो परिमाणमा शेयर खरिद-बिक्री गर्ने क्रम यस साता लगानीकर्ताले बढाएका छन् । अघिल्लो साताभन्दा उनीहरूले किन्ने शेयरको परिमाण १४ प्रतिशतले बढेको कारोबारमा देखिएको छ । कारोबार रकमका आधारमा यो साता दोस्रो बजारमा उत्कृष्ट १० मा परेका कम्पनीको शेयरको खरिद-बिक्रीको प्रवृत्तिमा शेयर कित्ताको अध्ययनले ठूलो परिमाणमा शेयर खरिद गर्ने क्रम बढेको देखाएको छ । सोही अवधिमा अघिल्लो साता यस्तै १० कम्पनीको कारोबारसँग तुलना गर्दा यस्तो देखिएको हो ।

यो साता कारोबार रकमका आधारमा लगानीकर्ताले सबैभन्दा बढी १० कम्पनीका शेयर ८० करोड रूपैयाँमा खरिद-बिक्री गरे । जबकि अघिल्लो सोही अवधिमा यस्तो कारोबार ५३ करोड रूपैयाँको थियो । जसमा एक सय कित्तासम्मको कारोबारको हिस्सा औसत ६३.४९ प्रतिशत थियो । सय कित्तादेखि पाँच सय कित्तासम्म खरिद गर्नेको हिस्सा ३७ प्रतिशत, हजारदेखि दुई हजार कित्तासम्मको हिस्सा १२.३३ प्रतिशत, हजार कित्तादेखि १.५९ प्रतिशत र दुई हजार कित्ता १५.१३ प्रतिशत रहेको थियो ।

दुई हजार कित्ताभन्दा बढी शेयर खरिद गर्नेको हिस्सा १५ प्रतिशत देखिएको भए पनि त्यसमा सिद्धार्थ बैकको संस्थापक शेयरले बढी भूमिका खेलेको थियो । उसको कारोबार हटाउने हो भने उसको हिस्सा ०.९८ प्रतिशत मात्रै हुन आउँछ । बजारमा गत साता १० देखि सय कित्तासम्म शेयर खरिद गर्ने लगानीकर्ता बढी थिए भने दुई हजार कित्ताभन्दा ठूलो परिमाणमा शेयर खरिद गर्ने अत्यन्तै न्यून थिए । लगानीकर्ताको मनोबल कम भएकै कारण उनीहरूले सानो सानो परिमाणमा शेयर खरिद गर्ने क्रम बढी हुने गरेको थियो ।

यतिबेला बजार सुधार हुँदै आएको र कारोबार समेत बढ्दा यो साता लगानीकर्ताले शेयर कारोबारको मात्रा बढाएका छन् । अघिल्लो साता दुई हजार कित्ता शेयर खरिद गर्नेको संख्या निकै कम रहेकोमा यतिबेला २.१४ प्रतिशत पुगेको छ । सय कित्तादेखि पाँच सय कित्तासम्म शेयर खरिद गर्ने ३७.९७ प्रतिशत पुगेका छन् । पाँच सय कित्तादेखि हजार कित्तासम्म शेयर खरिद गर्ने ८.४३ प्रतिशत छन् । दुई हजार कित्ताभन्दा बढिको शेयर कारोबार गर्नेको औसत कारोबार २.१४ मा उक्लिएको छ । यो साता सामान्य कारोबारमै यस्तो देखिन्छ भने अघिल्लो साता संस्थापक शेयरले यो कारोबार बढाउन टेवा र्पुयाएको थियो । 

बिस्तारै लगानीकर्ताले शेयर खरिदको परिमाण बढाउँदै लैजाँदा कारोबार रकम र सूचक दुवैमा वृद्धि भएको छ । यो साता २ अर्ब ५६ करोड रूपैयाँ बराबरको शेयर कारोबार भयो । यो कारोबार गत साताको तुलनामा ८६.९४ प्रतिशत बढी हो । जबकि सोही अवधिमा अघिल्लो साता एक अर्ब ३७ करोड रूपैयाँमा कारोबार भएको थियो । 
कारोबार रकमसँगै यो साता सूचक ३.६ प्रतिशतले बढेको छ । यस साता सूचक ११७२.६५ अंकमा उक्लिएको छ । गत साता सूचक ११३१ अंकमा रहेको थियो ।    

सूचक बढेसँगै लगानीकर्ताको सम्पत्तिसमेत यो साता उल्लेख्य बढेको छ । कुल बजार पुँजीकरणको हिसाबले लगानीकर्ताले ५२ खर्ब रूपैयाँ बढाएका छन् । यो साता बजारको कुल बजार पूँजीकरण १४ खर्ब ८९ अर्ब रुपैयाँ पुगेको छ । गत साता १४ खर्ब ३७ अर्ब रूपैयाँ रहेको थियो ।