९ पुस/अर्थ र व्यापार– भन्सार विभागले सार्वजनिक गरेको तथ्यांकअनुसार चालू आर्थिक वर्षको पहिलो ५ महीनामा नेपाल–चीन व्यापार २५ अर्ब रुपैयाँले घटेको छ ।

विभागका अनुसार अघिल्लो वर्षको ५ महिनाको अवधिमा नेपाल–चीन व्यापार रू. १ खर्ब ३ अर्बको व्यापार भएको थियो । तर चालु आवको सोही अवधिमा आयात रू. २४ अर्बले घटेर ७७ अर्ब ८४ करोडको मात्रै व्यापार भएको हो ।

चालु आवको पहिलो ५ महिनाको अवधिमा निर्यात रू. ८६ करोडबाट घटेर ३८ करोडमा आइपुगेको छ । चीनले उत्तरी नाकामा लगाएको बन्दको प्रभाव आयात निर्यातमा देखिएको हो ।

नेपाल राष्ट्र बैंकले बुधवार सार्वजनिक गरेको प्रतिवेदनले चीनतर्फ हुने निर्यात ५९ दशमलव २ प्रतिशतले घटेको छ भने आयात पनि २५ प्रतिशतले घटेको छ ।

नेपाल हिमालय सीमापार व्यापार संघका अध्यक्ष बच्चु पौडेलले चीनले गतवर्ष माघदेखि उत्तरी नाका एकतर्फी रूपमा बन्द गरी चिनियाँ कन्टेनरले नै मुश्किलले दैनिक ४–५ कन्टेनर सामान नाकासम्म ल्याइदिने र नेपाली कन्टेनर पनि नाकापारि जान नपाउँदा नाकाबाट हुने व्यापार प्रभावित बनेको बताए ।