५ कात्तिक/अर्थ र व्यापार – अन्तर्राष्ट्रिय बजारमा मूल्य बढेपछि नेपाली बजारमा पनि छापावाल सुनको मूल्यले दैनिक लगातार नयाँ रेकर्ड बनाइरहेको छ । अत्यधिक मुल्य बढेर सोमबार नेपाली बजारमा छापावाल सुन प्रतितोला ६ सय रुपैयाँले महँगिएको छ । यस दिन नेपाली बजारमा सुनको भाउ प्रतितोला १ लाख ६५ हजार ६ रुपैयाँ पुगेको छ ।
अघिल्लो दिन १ लाख ६५ हजारमा कारोबार भएको थियो । दैनिक सुनको मुल्य अकासिएसँगै सोमबार चाँदीको मूल्यले पनि नयाँ रेकर्ड बनाएको छ ।
यस दिन असल चाँदीको मुल्य प्रतितोला २ हजार ९५ रुपैयाँ कायम भएको छ । चाँदीको यो मूल्य अहिलेसम्मकै उच्च भएको नेपाल सुनचाँदी व्यवसायी महासंघले जनाएको छ । अघिल्लो दिन चाँदी प्रतितोला २ हजार ७५ रुपैयाँ थियो ।
अन्तर्राष्ट्रिय बजारमा मूल्य आकाशिएपछि सोही अनुसार नेपाली बजारमा पनि सुनचाँदीको मुल्य बढेको महासंघले जनाएको छ । अहिले प्रमुख दुई कारणले सुनको भाउ बढाएको महासंघले जनाएको छ । महासंघका अनुसार पहिलो– मध्यपूर्वी युद्ध र दोस्रो– अमेरिकी चुनावको नतिजापछि आउन सक्ने अनिश्चितताका कारण यसरी सुनको मुल्य अकासिएको हो ।
जब विश्वबजारमा अन्तर्राष्ट्रिय तनाव र द्वन्द्व बढ्न थाल्छ, त्यसले सुनको माग ह्वात्तै बढाउने गरेको छ, यतिबेला मध्यपूर्वी युद्धको तनाव छ, अर्कोतिर अमेरिकी राष्ट्रपतिको चुनावपछि बढ्न सक्ने अनिश्चितताले लगानी सुनतिर मोडिएको हुनसक्ने अनुमान सम्बन्धीत सरोकारवालाहरुले गरेका छन् । यसैगरी, अमेरिकामा घट्दो ब्याजदरले पनि सुनको मूल्य बढाउन सहयोग गरिरहेको उनीहरुको अनुमान छ ।