१६ असोज/अर्थ र व्यापार – आँगन स्वीट्सका मिठाइ उत्पादन हुने कम्पनी आकाश फुड्समा वाणिज्य, आपूर्ति तथा उपभोक्ता संरक्षण विभागले छापा मारेको छ ।
सो क्रममा बाढीले भिजेको, प्याकेजिङ खुइलिसकेका, पुरानो तेल तथा खाद्यवस्तु प्रयोग गरी मिठाई उत्पादन भइरहेको भेटिएपछि विभागले २ लाख रुपैयाँ जरिवाना तिराएको छ ।
आकाश फुड्सले आँगन ब्राण्डका मिठाइ उत्पादन गर्ने कम्पनीमा छापा मारि अनुगमन गर्ने क्रममा यस्तो अखाद्य बस्तु प्रयोग भएको जानकारी गराउँदै विभागका महानिर्देशक राजन दाहालले भने, ‘उनीहरूको वितरण निकै राम्रो देखिए पनि उत्पादन हुने स्थलमा उपभोक्ता हित प्रतिकुल अवस्था देखिएपछि कारबाही रुवरुप जरिवाना तिराइएको हो ।’
उनका अनुसार परिक्षणको क्रममा मिठाइ उत्पादनमा प्रयोग हुने तेलको उत्पादन मिति खुइलिसकेको, तेलको शुद्धीकरणमा ध्यान नदिएको, एक पटक प्रयोग गरेको तेललाई पुनः पटक पटक प्रयोग गरेको जस्ता कैफियत देखिएको थियो ।
विभागले मंगलबार नै जावलाखेलस्थित हानकुक साराङ रेष्टुरेन्टमा समेत अनुगमन गरेको थियो । अनुगमनको क्रममा ब्राण्ड उल्लेख नभएको मैदा प्रयोग भएको, उत्पादन मिति उल्लेख हुने लेबल नभएको गुणस्तरहिन सामान प्रयोग भएको भेटिएपछि ३ लाख रुपैयाँ जरिवाना तिराइएको थियो ।
दसैं तिहार र छठपर्व सुरुहुने समय नजिकिएसँगै विभागले पछिल्ला दिनमा ठूला र नाम कहलिएका ब्राण्डहरुमा अनुगमन बढाएको छ । जसमा धेरै कैफियत देखिएको विभागको अनुगमनबाट पाइएको छ । महानिर्देशक पौडेलले यस्ता नाम चलेका ब्राण्डहरुले समेत बदमासी गरेपछि विभिगले अनुगमन कार्यलाई थप तिब्रता दिने बताए । मानव स्वास्थमा खेलवाढ गर्ने यस्ता कम्पनीहरुमाथी कडा कारबाही हुने बताउँदै पौडेलले भने, ‘यस्ता नाम चलेका ब्राण्डहरू त अरुका लागि उदाहरण बन्नु पर्ने हो, तर उपभोक्ता हित प्रतिकुल हुने काम नै यस्तो ब्राण्डमा भेटिएको छ ।’