१५ असार / अर्थ र व्यापार – टुरिजम् डेभलपमेन्ट बैंकले गत असार ७ गतेदेखि खुला गरेको सात लाख चार हजार सात सय ३८ कित्ता सेयर लिलामीमा लगानीकर्ताले विहीबार कार्यालय समयसम्म शिलबन्दी बोलपत्र पेश गर्न सक्नेछन् ।

टुरिजमले बैंकले संस्थापक समूहको चार लाख ३८ हजार दुइृ सय कित्ता र सर्वसाधारण समूहको दुई लाख ६६ हजार पाँच सय ३७ कित्ता सेयर लिलामीमा राखेको हो । यसअघि बैंकले चैत १३ गते देखि वैशाख २६ गते सम्म ९१ लाख ९७ हजार ७१२ कित्ता हकप्रद सेयर बिक्री खुला गरेकामा उक्त परिमाणको सेयर विक्री नभएपछि लिलामी खुला गरेको थियो । 

लिलामी सेयर सर्कान इच्छुक लगानीकर्ताले बैंकको सेयर बिक्री प्रबन्धक एनआइबीएल क्यापिटल मार्केट्स लाजिम्पाटबाट आवेदन फारम बुझाउन सक्नेछन् । बोलपत्र पेश गर्दा न्यूनतम १०० रुपैयाँलाई आधार मानेर त्यसभन्दा बढी मूल्यमा एक सय कित्ताभन्दा बढि १० कित्ताको गुणांकमा आवेदन दिन पर्नेछ ।

बोलपत्र असार १६ गते बिहान ११ बजे एनआइबीएल क्यापिटल मार्केट्स लाजिम्पाटमा खुला हुने छ ।

मेगा बैंकसँग मर्जर पक्रियामा रहेको एक अर्ब ११ करोड २० लाख रुपैयाँ चुक्ता पूँजी  रहेको टुरिजमले चालु आर्थिक वर्षको तेस्रो त्रैमासमा बैंकले २० करोड ९ लाख रुपैयाँ खुद नाफा कमाएर प्रतिसेयर आम्दानी वार्षिक २९ रुपैयाँ १३ पैसा कायम गरेको छ ।

बैंकको सेयर मेगा बैंकसँग मर्जरमा  गएपछि नेपाल स्टक एक्सचेञ्जमा प्रतिकित्ता ४२७ रुपैयाँमा कारोबार रोक्का भएको थियो । मेगा बैंकको सेयर भने अन्तिम पटक प्रतिकित्ता ४५८ रुपैयाँमा कारोबार भएको थियो ।