२१ असार / अर्थ र व्यापार – शिखर इन्स्योरेन्सले तत्काल थप नयाँ साधारण शेयर अर्थात एफपीओ जारी गर्न नपाउने भएको छ । धितोपत्र बोर्डले जारी गरेको धितोपत्र दर्ता तथा निस्कासन निर्र्दे्शिका २०७४ अनुसार शिखरले दोहोर्याएर एफपीओ जारी गर्न नपाउने भएको हो । शिखरले तत्काल एफपीओ जारी गर्न नपाउने निर्णय गर्दै धितोपत्र बोर्डले उसको आवेदन सम्बन्धि विवरणलाई वेभसाइटबाट समेत हटाएको छ । 

धितोपत्र दर्ता तथा निस्कासन निर्र्दे्शिका २०७४ मा संगठित संस्थाले धितोपत्रको थप सार्वजनिक निष्काशन गरेको मितिले ५ बर्ष पूरा नभएसम्म पुनः धितोपत्रको थप सार्वजनिक निष्काशन गर्न नसक्ने ब्यवस्था अनुसार शिखरको एफपीओ जारी गर्न अनुमति नदिइएको हो । शिखरले अघिल्लो बर्ष मंसिरमा एफपिओ जारी गरेकाले अर्को एफपिओ जारी गर्न अझै साढे तीन बर्ष कुर्नु पर्नेछ । शिखरले थप सार्वजनिक निष्कासन (एफपीओ) जारी गर्न गत फागुनमा धितोपत्र बोर्डमा आवेदन गरेको थियो । 

शिखर ईन्स्योरेन्सले केही हप्ता अगाडि नेपाल स्टक एक्सेचेञ्ज मार्फत थप नयाँ सेयर एफपिओ निष्कासन तथा बोनसबाट विमा समितिले तोकेको पूँजी पुर्याउने योजना सार्वजनिक गरेको थियो । अब कम्पनीले बीमा समितिले तोकेको एक अर्ब चुक्तापूँजी बोनसबाटै पुर्याउनु पर्ने छ । 

हाल शिखरको ८१ करोड चुक्ता पूँजी रहेको छ भने जगेडा कोषमा २४ करोड छ । उसले तोकेको चुक्तापूँजी पुर्याउन १९ करोडको बराबरको बोनस सेयर दिए पुग्ने अबस्था छ । शिखरले तेस्रो त्रैमाससम्ममा खुद बीमा शुल्क एक अर्ब १४ करोड नघाएको छ भने २६ करोड खुद नाफा कमाएको छ ।