२२ जेठ / अर्थ र  व्यापार-जेठ १६ गतेदेखि नेपाल ग्रामिण विकास बैंकले खुला गरेको रुरल माईक्रोफाइनान्सको ८८ हजार पाँच सय ६४ दशमलव ७४ कित्ता संस्थापक सेयर लिलाममा आवेदन गर्ने सोमबार अन्तिम दिन हो । आफ्नो स्वामित्वमा रहेको रुरल माईक्रो फाईनान्स कम्पनीका संस्थापक सेयर साबिकका माईक्रोफाईनान्सको संस्थापक सेयरधनीलाई बेच्न बैंकले लिलामी खोलेको हो । 

सोमबार कार्यालय समयभित्र रुरल माईक्रोको इच्छुक संस्थापक सेयरधनीले कम्पनीको लिलामी सेयरमा विक्री प्रबन्धक एनएमबि क्यापिटलमा न्युनतम एक हजार कित्तादेखि सबै कित्ताका लागि आवेदन गर्न सकिने छ । बोलपत्र जेठ २३ गते मंगलबार एनएमबि क्यापिटलमा ४ बजे खोलिने छ । 

नेपाल ग्रामिण विकास बैंकले रुरल माईक्रो फाईनान्सको संस्थापक सेयर पाँच सय एक रुपैयाँ न्युनतम मूल्य राखेर लिलाम बढाबढ गर्न लागेका हो । यसबाट बैंकले प्रतिकित्ता ४०१ रुपैयाँको दरले न्युनतम तीन करोड ५४ लाख ७५ हजार रुपैयाँ बढि प्रिमियम संकलन गर्नेछ भने चार करोड ४३ लाख ७० हजार बढि आम्दानी गर्नेछ । 

५५ करोड ७५ लाख रुपैयाँ चुक्ता पूँजी रहेको लघुवित्त कम्पनीले चालु आर्थिक बर्षको चैत मसान्तसम्ममा १९ करोड ५८ लाख रुपैयाँ खुद नाफा कमाएर प्रतिसेयर आम्दानी ४६.८३ रुपैयाँ कायम गरेको छ । नेपाल ग्रामिण विकास बैंकले एक सय रुपैयाँ अंकित दरमा नौ लाख ७५ हजार कित्ता एफपीओ जारी गर्न धितोपत्र बोर्डमा निवेदन दिएको छ ।