३ साउन / अर्थ र व्यापार – ओम डेभलपमेन्ट बैंकको नेपाल स्टक एक्सचेञ्ज (नेप्से) मा सेयरमूल्य समायोजन भएर सेयर कारोबार खुलेको छ ।  मनास्लु विकास बैंकसँगको मर्जर प्रक्रियाका कारण २०७३ असोज २१ गतेदेखि बैंकको सेयर कारोबार रोकिएको थियो । एकीकृत कारोबार थालेको एक महिनापछि मात्र सेयर कारोबार खुला भएको हो ।

बैंकले गत आर्थिक बर्षको नाफाबाट वितरण गरेको २९.२ प्रतिशत बोनसलाई समायोजन गरी प्रतिकित्ता सेयरमूल्य ४८७ रुपैयाँ निर्धारण गरेको हो । समायोजन पछि बैंकको सेयर मंगलबार ४८७ रुपैयाँमा कारोबार खुला भएको छ । यस्तै बैंकको औषत आधारमूल्य ३८० रुपैयाँ रहेकोे छ । यसअघि मनास्लु विकास बैंकसँग मर्जरका कारण बैंकको सेयर कारोबार रोकिएको थियो । असार २ गतेदेखि ओमले एकीकृत कारोबार थालीसकेको छ ।

मनास्लु गाभिएपछि ओमको चुक्ता पुँजी १ अर्ब ६४ करोड ३९ लाख ४४ हजार ७९५ रुपैयाँ पुगेको छ । बैंकले यो चुक्ता पुँजीको ३०५ हकप्रद सेयर जारी गर्न धितोपत्र बोर्डसँग अनुमति मागेको छ । गत आर्थिक वर्षको तेस्रो त्रैमासमा ओमले २६ करोड ५७ लाख १६ हजार रुपैयाँ खुद नाफा कमाएको थियो ।

धितोपत्र बोर्डले एकीकृत करोबार सुरु गरेको १५ दिनभित्र सेयर कारोबार थाल्न निर्देशन दिने गरेपनि बोर्डले निर्देशनको प्रभावकारी कार्यन्वयन गराउन नसक्दा तथा मर्जरको प्रकृयागत कारण देखाउँदै प्रायः सबै बैंकहरुले १५ दिनमा सेयर कारोबार सुरु गर्ने गरेको पाँइदैन ।