२२ असार / अर्थ र व्यापार – नेपाल कम्युनिटी डेभलपमेन्ट बैंकको विहीबारबाट नेप्सेमा कारोबार खुलेको छ । सांग्रिला डेभलपमेन्ट बैंकले एक्वायर गर्ने सम्झौता गरेपछि बैंकको सेयर कारोबार रोक्का भएको थियो । तर सांग्रिलाको विशेष साधारणसभाले नेपाल कम्युनिटी डेभलपमेन्टलाई खरिद गर्न अस्विकार गरेपछि बैंकको पुन सेयर कारोबार खुलेको हो ।

नेप्सेले बैंकले साधरणसभाबाट पारित गराएको ५.१५ प्रतिशत बोनस सेयर समायोजन गराएर सेयर कारोबार सुचारु गराएको छ । बोनसपछि बैंकको सेयरमूल्य प्रतिकित्ता २८० रुपैयाँ कायम भएको छ । जसको औषत आधारमूल्य २६० रुपैयाँ रहेको छ ।

बैंकले गत आर्थिक बर्षको कमाईबाट सेयरधनीलाई चुक्ता पूँजीको ५.१५ प्रतिशत बोनस सेयर वितरण गर्ने प्रस्ताव पारित गरेको थियो । बोनस वितरणपछि बैंकको चुक्ता पूँजी २२ करोड दुई लाख ९४ हजार रुपैयाँ पुगेको छ । साधारणसभाबाट अनुमोदन भएको १२० प्रतिशत हकप्रद जारी गरेपछि बैंकको चुक्ता पूँजी ४८ करोड ४६ लाख ४८ हजार रुपैयाँ पुग्नेछ ।

सांग्रिलाले प्राप्ती गर्ने प्रस्ताव अस्वीकार गरेपछि बैंकले आफै हकप्रद जारी गरी चुक्ता पूँजी पुर्याउने निर्णय गरेको छ । बैंकको सातौं साधारणसभाले १२० प्रतिशत अर्थात एक कित्ता सेयर बराबर एक दशमलव २० कित्ताका दरले हकप्रद सेयर निश्कासन गर्ने प्रस्ताव पारित गरेको थियो ।